iklan

EKONOMIA, HEADLINE

Alterasaun Klimátika fó Impaktu bá Saúde Umana

Alterasaun Klimátika fó Impaktu bá Saúde Umana

Sekretáriu Ezekutivu Interinu Autoridade Nasionál Dezignada, SEA, Julião dos Reis. Imajen/Florencio Miranda Ximenes.

DILI, 09 outubru 2019 (TATOLI) – Sekretáriu Ezekutivu interinu Autoridade Nasionál Dezignada no Assessor Prinsipál iha Sekretáriu Estadu Ambiente (SEA), Julião dos Reis, hatete alterasaun ka mudansa klimátika iha mundu fó impaktu ba saúde umana.

Julião dos Reis dehan daudaun iha mundu ne’e rai komesa manas aumenta kada tinan sa’e ba temperatura anomaly (derajat celsius) 0,6.

“Alterasaun klimátika ne’e mai husi ema nia hahalok hodi rezulta kamada ozóniu ne’ebé mihis ona, rezulta loron manas tebes hodi afeta ba saúde umana no balada sira”, Julião dos Reis afirma bainhira sai oradór iha Semináriu Jornalizmu : Salva Ambiente, iha Otél Timór, ohin.

Hahú husi 1985 to’o ohin ‘oron, kamada ozóniu mihis ona kuaze porsentu 4% to’o 6% no radiasaun ultra violet ka solár ultraviolet ne’e aumenta porsentu 10 ona.

“Ita husu ba sidadaun hotu atu hasa’e konsiénsia hodi asegura no kuidadu ambiente liuliu labele sunu rai no tesi ai arbiru no soe lixu iha fatin”, katak.

Nia dehan, sunu rai no tesi ai arbiru aumenta dióksidu karbonu (CO2) atmosfera, degradasaun floresta aumenta rai manas no rai maran, tasi sa’e, bailoron-naruk, udan la tuir tempu.

“Povu sira sei moris ho má nutrisaun, moras azma, katarata (katarak), kankru kulit no seluk, inklui bele hasa’e númeru violénsia doméstika, impaktu ba produsaun agrikultura no pekuária”, katak.

Tanba ne’e, nia husu ba sidadaun hotu atu hasa’e konsiénsia hodi asegura ambiente hodi bele fó anin (ar) saudavel ba ema no balada sira iha planeta ne’e.

Iha fatin hanesan, Dosente Departamentu Komunikasaun Sosiál UNTL, Marcelino Magno, dehan jornalista tenke fó importánsia ba kobertura ambiente tanba labele haketak ona husi ema nia moris loroloron.

“Ita haree kuandu ambiente la saudavel, ema mós moris la saudavel, tanba ne’e mundu tomak tau atensaun ba ambiente husi ativista, artista, líder polítiku no mídia to’o líder relijiozu sira atu hamosu idea koletiva hodi asegura ambiente”, afirma.

Notísia relevante : Papél Jornalista Importante “Salva Ambiente”

Moris Iha Ambiente Saudavel, Iha Devér Atu Asegura

Jornalista : Florencio Miranda Ximenes

Editora : Maria Auxiliadora

iklan
iklan

Leave a Reply

iklan
error: Content is protected !!