Abertura ba formasaun ba funsionáriu tékniku enjeñeiru MOP nian na’in-26. Imajen/ Natalino Costa.

DILI, 08 outubru 2019 (TATOLI) – Embaixadór Portugál iha Timor-Leste, José Pedro Machado Vieira, afirma Governu Portugés kontinua apoia Timor-Leste liuhosi kapasitasaun rekursu umanu.

Lia hirak ne’e hatún bainhira José Machado partisipa iha abertura formasaun kona-ba patolojia (espesialidade) reabilitasaun patrimóniu edifikadu ne’ebé realiza iha Otél JL Villa, Fatu-hada, ohin.

Formasaun ne’e realiza tanba kooperasaun Governu Portugés ho Timor-Leste liuhosi Ministériu Obra Públika (MOP), atu fó kapasitasaun tékniku enjeñeiru sivíl hosi MOP hamutuk 26 iha área patolojia ba reabilitasaun patrimóniu edifikadu ba faze daruak nian.

José Machado enkoraja funsionáriu MOP atu hatudu seriedade hodi aproveita tempu nune’e, bele aprende buat ruma ne’ebé peritu sira fó.

Iha fatin hanesan, Vise-Ministru MOP, Nicolau Lino Freitas Belo, hatete formasaun ne’e realiza ho objetivu atu fó koñesimentu ka atu hasa’e esperiénsia tékniku funsionáriu MOP nian.

“Funsionáriu sira ne’e nu’udar tékniku enjeñeiru konstrusaun sivíl hosi MOP, hosi diresaun nasionál estrada, ponte no kontrolu inklui funsionáriu tékniku enjeñeiru diresaun jerál laboratóriu nasionál peskiza no dezenvolvimentu, sira sei tuir formasaun iha ida-idak nia área espesífiku ne’ebé sei fó hosi peritu husi Portugal”, dehan nia.

Nune’e mós Tékniku Enjeñeiru MOP, Armando Monteiro, sente kontente tanba bele aprende buat barak kona-ba tékniku enjeñeiru serbisu MOP nian.

Antes ne’e, Governu Portugal liuhosi nia reprezentante iha Timor-Leste fó ona formasaun ba tékniku enjeñeiru MOP hamutuk 13 ne’ebé konklui ona iha faze dahuluk no ofisialmente simu sertifikadu hafoin fulan neen tuir formasaun.

Entretantu, iha serimónia ne’e hetan prezensa hosi Diretór Jerál MOP, Diretór Fundu Dezenvolvimentu Kapitál Umanu (FDCH, sigla portugés), Embaixadór Portugál iha Timor-Leste no Vise-Ministru Obra Públika.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here