Diretora Klínika Privada PAS, Maria Dia. Foto TATOLI: Nelia Fernandes

DILI, 08 outubru 2019 (TATOLI)-Fundadora ka Diretora Klínika Privadu, Prontu Atu Serbi (PAS), Maria Dias informa katak moras Infesaun Vias Respiratóriu (ISPA) rejistadu aas iha klínika ne´e. Moras ne´e mosu tanba ambiente la moos.

“Raí rahun barak, barak sunu ai, uma laran ladún moos. Ne’e mak halo ema sempre me´ar, inus-been, buat sira ne’e mak durante ne’e barak,” esplika Diretora Maria Dias bainhira entrevista ho Ajénsia TATOLI iha nia kna´ar fatin, PAS, Becora, Dili, tersa ne´e.

Nia esplika mós katak iha klínika PAS ne´e médiku sira halo atendimentu hanesan sistema ne´ebé funsiona normalmente. Katak, sira fó tiha konsulta, depois fó reseita, pasiente sira ba foti ai-moruk.

“Kona-ba moras ne’e aimoruk ne’e governu nian, mezmu ami hanesan NGO, klínika ida ne’ebé serbisu hamutuk ho governu no médiku ne’e mós governu mak selu,” relata Klínika PAS.

Nia haktuir katak PAS estabelese kooperasaun ho governu tanba ne´e médiku sira mós governu mak selu, ai-moruk sira, moras sira konsulta ba foti iha ai-moruk governu nian. “Ne’ebé orsamentu ba ha´u la hatene tanba governu mak prepara ona, ai-moruk husi governu, médiku mós husi governu”.

“Ha’u-nia partisipasaun ne’e mak ne’e ha’u fó fatin, prepara buat hotu mós, pois ami mós organiza pasiente sira, ne’e mak halo atendimentu, ne’e ha’u ko’alia kona-ba moras,” tenik fundadora ne’e.

Kona-ba parte nehan ni’an, fundadora ne’e hateten katak Klínika PAS serbisu hamutuk ho dentista voluntáriu australianu sira. “Sira suporta ekipamentu, ami suporta nafatin fatin no buat hotu ne’ebé atu kobre ba fatin ne’e ami mak responsabilidade”.

“Tanba ne’e ami mós la hetan orsamentu husi kualker fatin ida, entaun ami hodi tau fokit nehan 7 dolar, ba hamoos solda 10 dolar kada ida, se mak hakarak tau nehan falsu 25 dolar, ne’e foin fulan rua, tolu ne’e mak muda, mais uluk liu ami husu de’it 50 cent, pois sa’e ba 1 dolár, sa’e ba 5 dolár, to’o ba 8 dolár,” katak fundadora ne’e.

Ezekutiva Klínika PAS ne´e haktuir mós katak Klínika PAS bainhira la iha finanseiru, la hanoin atu para. “Ami nunka hanoin atu para, osan iha ka la iha, ami la hanoin atu para, sempre serbisu lao nafatin,” nia kompromete.

Fundadora ne’e informa, aban bainrua sei halo fali klínika boot ida, liuliu ba iha ida mós dentária ni’an . Importante tebes iha Timór tanba susar lós. “Klínika ne’e rasik, bele halo ajuda tan ba fó partus no USG (Ultrasonografia) tanba USG ne’e ema hotu tenke halai ba ospitól, ne’e susar la halimar, nia konsidera.

“Ami harakak halo buat di’ak liu fali ba komunidade, ha’u hanoin ne’e hanesan modelu ida se ami halo buat ne’e di´ak ba komunidade ne’e, futuru governu bele adopta ba komunidade sira seluk,” tenik Diretora Maria Dias.

Maria Dias Aumenta, hakarak liuliu ne’e feto sira kuandu isin-rua to’o ona fulan lima ka ne’en ne’e, USG ne’e sira tenke halo tanba iha Klínika Becora sira la iha USG, ema hotu ba ospitál. Kuandu ba halo USG iha ospitál ne’e, sira haree ida ne’ebé problema, ida ne’ebé la problema la halo USG ida tanba ne’e sira balun halai ba iha klínika privada maibé karun, até balun to’o partus mós lá hatene nunka atu ba leno.

“Buat sira ne’e hotu ami fokus, ami lakohi buat ne’ebé governu halo ona, ita halo, maibé buat ne’ebé governu halo seida’uk kompletu entaun ita halo,” dehan Diretora Maria Dias.

Nia hatutan, halo USG, alende ba inan feto isin-rua, se bele halo fatin ida ba partus ninian, ne’e mós la’os ba ema hotu tenke mai partus iha ne’e maibé hakarak halo modelu di´ak ida. Ita bele loron ida simu ema na’in rua ka na´in tolu maibé ho nia sistema ida ne’ebé kapás.

“Ida fali mak ba maluk sira ne’ebé opera ona ibun sakat, sira mai iha ne’e mas hadi’a fali sira-nia nehan, para sira bele integra aan iha komunidade tanba labarik balun sira moe ba eskola ka ba eskola hamoe sira tanba ko’alia la mós,” katak diretora ne’e.

Iha biban hanesan,  Fundadora no Diretora  Klínika PAS, Maria Dias informa katak vizaun Klínika PAS nian mak ema hotu liuliu sidadaun hotu iha Timor-Leste bele hetan saúde di’ak, nia hatene duni saúde ba nia importante nia bele haksolok ho nia moris. Misaun Klínika PAS nian mak serbi povu, liuliu kada familia.

Buka sidadaun ne’e rasik atu hatene, komprende saida mak saúde ne’e loloos. Oinsá prevene moras. Atu prevene nia labele hetan moras ne’e, orsida bele hetan moras ne’e aat liu ba nia saúde. “Ami koko atu ema hotu pelumenus kada família ne’e bele moris ho hahán ka hela fatin la’ós ida mewah (luxu) maibé pelumenus sufisiente ba ninia moris katak nia bele moris hamesan ema,” tenik diretora ne’e.

Enkuantu, objetivu Klínika PAS, tuir Diretora Maria Dias, “Prontu Atu Serbi”. Katak, prontu atu serbi iha 24 oras nia laran. “Ne’e ami prontu, em qualquer momentu,” nia subliña.

Ezisténsia Klínika Privada PAS ne´e tinan 20 ona, iha komunidade Remac (Becora).  “Klínika Remack halo atendimentu tuir ami-nia fokus ne’e dehan Saúde Na Família. Ami iha bairru ida ne’e, Aldeia Maukoko Mate ne’e familia de’it mak duzentus e tal familias, ema ka abilitante de’it mais de dois mil e tal”.

“Ne’e mak ami fó apoiu serbisu ne’ebé loroloron doutór sira ami sempre haree nia risku ne’e hotu, ami sempre tama sai no ami mós la taka odamatan ba kualker moras ne’ebé mak husi bairru seluk ka husi distritu (munisípiu) seluk atu konsulta,” dehan Diretora Maria Dias.

Diretora  ne´e informa, Klínik PAS simu nafatin konsulta maibé hanesan ninia mekanizmu hanesan mai doutora konsulta, kuandu iha suspeitu katak, nia iha moras ne’ebé mak presiza espesialista, halo rujukan (enkamiña) ba espesialista iha ospitál.

“Maibé maneira ami-nia hanesan ne’e, espesialista ne’e nia naran, nia loron konsulta, nia oras ne’e ami tau ona iha ne’ebá, ho nia númeru telefone ne’ebé ami hatene ne’e, ami langsung (direta) telefone ba espesialista ne’e katak, ami-nia pasiente hanesan ne’e, ami sei haruka ba ita-boot”.

“Ami koko atu pasiente ne’e labele lakon no ami mós serbisu ho governu, reseita ne’ebé mak foti ai-moruk, doutora halo tiha reseita sira ba foti iha Klínika Becora. Importante de’it mak Sistema Na Familia ida horbainhira halo ona ne’e, hanesan família ida ho nia xefe família ho nia númeru entaun ami tau de’it nia xefe família no nia númeru família nia, entaun prontu to’o iha ne’ebá sira hatama iha sistema, naran ho númeru sai ona, prontu sira fó ona ai-moruk, ne’e sistema kapás loos,” katak Maria Dias.

Iha parte seluk, diretora ne´e realsa, komunidade ne’e hotu nia KK de’it, sira fokus komunidade 200 liu no kada família ho nia risku ka moras ne’e idaidak tau ona iha grupu ho kompletu.

Nia mós hateten, fatin Klínika PAS ne’e mós estudante medisina sira, mai halo sira-nia estudu ida kona-ba Saúde Na Família ne’e rasik, iha estudante na’in rua mak foin ezame finál.

Diretora informa tan, Klínika Recmak ka Klínika PAS hanesan Klínika ONG (Organizasaun Naun Governamentál).

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here