Prezidente Eleitu AFEMDIL, Maria de Fátima Amorin. Imajen/Osória Marques

DILI, 08 Outubru 2019 (TATOLI)-Kongresu Asosiasaun Feto Munisípiu Dili (AFEMDIL), ohin, termina ona ho rezultadu eleisaun ba estrutura foun ne’ebé lidera husi Maria de Fátima Amorin.

Notísia Relevante : AFEDIL Nakfilak ba AFEMDIL

Konzaten votu ba estrutura foun AFEMDIL. Imajen/Osória Marques

Maria Amorin eleitu ho votu 37 nu’udar kandidatu husi pakote A bainhira kompete ho kandidatu nain rua seluk, husi pakote B Maria Carvalho ho votu 17 no Salustiana Simões husi pakote C ho votu 30.

 Prezidente eleitu  AFEMDIL), Maria de Fátima Amorin, afirma iha nia kompromisu lideransa nian ba AFEMDIL iha programa prioridade haat (4) iha mandatu tinan haat nia laran, kompostu husi planu dezenvolvimentu munisípiu Dili, estabelese kooperativa atu apoia no hadi’a feto maluk sira nia vida ekonomia no fasilita formasaun polítika ba igualdade jéneru.

Kongresu ne’ebé hala’o durante loron rua, segunda-tersa (07-08/10/2019), iha Salaun Ministériu Solidariedade, Sosiál no Inkluzaun (MSSI) ne’e partisipa husi kongresista ka delegada na’in 85 ne’ebé la’o iha ambiente unidade no transparente.

Estrutura AFEMDIL periodu tinan haat (2019-2023), kompostu husi Prezidente eleitu Maria de Fátima Amorin, vise koordenadór ba kada postu administrativu neen  (6) ema ida no mós Sekretaria nain rua no tezoureira nain ida.

“Imi fó mai ha’u hodi sai Prezidente AFEMDIL no fiar katak ha’u nia feto potensiál sei kaer liman hamutuk hodi lori feto ba dezenvolvimentu,” hateten prezidente eleitu Maria Amorin, ne’ebé antes ne’e hanesan Vise Koordenadór AFEDIL iha Postu Administrativu Dom Aleixo.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here