Diretór Nasionál Peskiza Dezenvolvimentu Laboratóriu Ministériu Obra Públika (MOP), Saturlino Gomes de Caldas. Imajen/Natalino Costa.

DILI, 08 outubru 2019 (TATOLI) – Diretór Nasionál Peskiza Dezenvolvimentu Laboratóriu Ministériu Obra Públika (MOP), Saturlino Gomes de Caldas, hatete laboratóriu nasionál ne’ebé tutela iha MOP sufisiente ona atu halo teste ba materiál konstrusaun, maibé iha dezafiu kona-ba rekursu umanu.

“Ita-nia materiál laboratóriu daudaun ne’e sufisiente, ita nian aparellu kompletu atu koko alkatraun no koko rai soké menus maka rekursu umanu liuliu tékniku sira ne’ebé ho kapasidade atu serbisu ba área ne’e maka sei menus tanba to’o agora seidauk rekruta”, lamenta Saturlino Gomes ba jornalista sira iha Otél JL Villa, Fatu-hada, ohin.

Enkuantu, tékniku laboratóriu ne’ebé serbisu iha MOP, daudaun ne’e hamutuk 33, tanba ne’e rekursu umanu seidauk sufisiente.

“Ha’u iha proposta orsamentu tinan kotuk no tinan oin nian atu halo rekrutamentu, maibé seidauk bele tanba Ministériu Obra Públika rasik nia orsamentu haree ba nesesidade ministériu nian tanba ita hatene katak MOP ne’e iha diresaun lubun boot ida ne’ebé presiza tau matan”, salienta.

Maibé, bá oin MOP tenke tau ona prioridade ba laboratóriu nasionál ne’ebé maka sei iha diresaun jerál ida nian okos husi MOP nian. Tanba ne’e, iha futuru laboratóriu labele iha diresaun ida nian okos, maibé oinsá nia sai ona autónomu ida hodi hamriik mesak hanesan laboratóriu nasaun Comunidade dos Países da Língua Portuguesa (CPLP, sigla portugés), ho nune’e maka presiza rekursu umanu ne’ebé sufisiente atubele responde ba serbisu sira ne’ebé laboratóriu ne’e atu halo.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here