Embaixadór Indonézia ba Timor-Leste, Sahat Sitorus. Imajen/Egas Cristóvão

DILI, 08 outubru 2019 (TATOLI) –Kanselamentu Viajen Xefe Estadu, Francisco Guterres Lú Olo ba Indonézia hodi partisipa tomada pose Prezidente Repúblika Indonézia, Joko Widodo (Jokowi), la fó impaktu ba relasaun bilaterál nasaun rua (Timor-Leste no Indonézia).

Embaixadór Indonézia ba Timor-Leste (TL), Sahat Sitorus ko’alia kestaun ne’e iha Palásiu Prezidente Nicolau Lobato, Bairru Pité, Dili, ohin, hafoin enkontru ho Prezidente Lú Olo hodi ko’alia kona-ba novidade polítika ne’ebé akontese ona, liliu kona-ba dinámika polítika iha kontestu demokrasia relasiona ho konvite hosi Prezidente Repúblika Indonézia, Joko Widodo (Jokowi), espesiál ba Prezidente Repúblika (PR), Lú Olo atu partisipa iha serimónia tomada pose ne’ebé sei hala’o iha loron 30 fulan ne’e.

“Durante enkontru, Prezidente Repúblika Lú Olo esplika katak maski ho situasaun ne’e, laiha impedimentu ba nasaun rua nia kooperasaun no sei kontinua hametin no dezenvolve kooperasaun iha aspetu hotu-hotu”, Sitorus haktuir.

Lee mós: PN La Autoriza Viajen PR Lú Olo ba Indonézia no Japaun

Hosi esplikasaun PR Lú Olo, nia dehan, hanesan reprezentante espesiál, nia sei hato’o ba Prezidente Joko Widodo liuhusi Ministru Negósiu Estranjeiru Indonézia.

“Ha’u sente onradu tanba bele hasoru malu direta no rona rasik esplikasaun hirak ne’e. Ha’u sei esplika ba Prezidente Jokowi”, Sitorus hateten.

Nia informa, bainhira rona tiha esplikasaun hirak ne’e, hanesan reprezentante Prezidente Jokowi no embaixadór Indonézia, halo análiza no tetu hodi foti konkluzaun katak desizaun ne’e (kanselamentu viajen PR) la afeta ba relasaun bilaterál rai rua.

“Parte Indonézia respeita desizaun ne’ebé Parlamentu TL foti no komprende dinámika polítika iha Timor-Leste, tanba tuir konstituisaun, bainhira PR hakarak hala’o vizita Estadu ba rai li’ur, tenke liuhusi aprovasaun Parlamentu Nasional”, katak Sitorus.

Nia salienta katak sei iha oportunidade barak liu atu dezenvolve iha futuru entre nasaun rua, liliu iha kontestu no dinámika demokrasia, sei fó mós oportunidade ba Xefe Estadu Lú Olo atu halo vizita ba Indonézia iha futuru.

Embaixador Sitorus mós iha esperansa katak, hafoin tomada pose, Prezidente Jokowi bele halo vizita mai Timor-Leste atu hametin liután ajenda kooperasaun rai rua nian.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here