Diretór Nasionál Peskiza Dezenvolvimentu Laboratóriu Ministériu Obra Públika (MOP), Saturlino Gomes de Caldas. Imajen/Natalino Costa.

DILI, 08 outubru 2019 (TATOLI) – Diretór Nasionál Peskiza Dezenvolvimentu Laboratóriu Ministériu Obra Públika (MOP), Saturlino Gomes de Caldas, hatete Ministru Obra Públika orienta ona diresaun jerál obra públika bainhira nahe alkatraun tenke koordena ho Servisu Bee no Saneamentu (SAS) atubele haree kanu bee nian, nune’e labele afeta ba estrada nia kualidade.

“Ministru orienta diresaun jerál ida-idak atu halo traballu koordenasaun, hanesan diresaun obra públika, nahe estrada tenke husu Serbisu Água no Saneamentu atu oinsá bele haree kanu bee nian, nune’e labele afeta ba estrada nia kualidade”, dehan Saturlino Gomes de Caldas ba jornalista sira iha Otél JL Villa, Fatu-hada, ohin.

Bainhira sobu ka ke’e alkatraun, entaun bee nalihun tan, dalaruma mós ema fase karreta iha estrada klaran no bee dalan mós intupidu, entaun to’o tempu udan bee halai la di’ak, alkatraun naksobu ka estrada aat.

Tanba ne’e, atu evita situasaun hirak ne’e, presiza iha koordenasaun serbisu ne’ebé di’ak atubele garante kualidade estrada iha futuru, nune’e gradualmente MOP rezolve ho planu integradu atu prevene labele akontese tan iha oin.

Antes ne’e, Parlamentu Nasionál kestiona MOP ho Ajénsia Dezenvolvimentu Nasionál (ADN) kona-ba estrada ne’ebé kuandu hadi’a la kleur aat filafali, maibé parte kompetente hatán katak la’ós estrada maka laiha kualidade tanba alkatraun liuhosi teste no tuir espesifikasaun ne’ebé iha, maibé mentalidade ema maka dalaruma ke’e fali estrada hodi monta kanu bee nian.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here