Embaixadór Indonézia ba Timor-Leste, Sahat Sitorus. Imajen Tatoli/Cipriano Colo

DILI, 08 outubru 2019 (TATOLI) – Embaixadór Indonézia iha Timor-Leste, husu sidadaun (vendedór) Indonézia ne’ebé hala’o negósiu iha Kampung Alor, Dili, atu kumpre Lei no regulamentu sira ne’ebé estabelese iha Timor-Leste.

Sahat Sitorus husu ne’e, hafoin hala’o enkontru ho Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, ohin.

Sitorus ba mídia hateten, hanesan sidadaun indonézia, hanesan mós sidadaun estranjeiru, primeiru tenke obedese no halo tuir lei ne’ebé vigora iha Timor-Leste.

Lee mós: Membru PN Husu Vendedór Kampung Alor Koopera ho Órden Governu

Tanba ne’e, Sitorus hateten bainhira Governu Timor-Leste hola desizaun ruma atu muda vendedór sira ne’ebe iha Kampung Alor ba fatin foun, tenke kumpri tanba Sitorus konsidera desizaun ne’e hanesan desizaun ida ne’ebé di’ak liubá vendedór sira.

Nia fiar katak desizaun ne’ebé Governu Timor-Leste hola nu’udar desizaun ida ho objetivu ne’ebé di’ak liu.

Aleinde ida ne’e, Sitorus mós fó hanoin ba vendedór sira katak bainhira atu hetan buat di’ak tenke prontu atu infrenta dezafiu, tanba desizaun Governu nian hodi muda vendedór sira husi Kampung Alor ba Golgota (Comoro) nu’udar dezafiu ida.

“Durante ne’e, vendedór sira hela fatin di’ak, hakmatek, hetan rendimentu di’ak iha Kampung Alor no oras ne’e sei muda ba fatin di’ak iha Golgota, maski seidauk bele hetan rendimentu di’ak hanesan iha Kampung Alor,” nia subliña.

Lee mós: Negosiante Sira Laiha Kbiit Aluga Fatin iha Golgota

Liután ida ne’e,  nia haktuir, bainhira iha ona Golgota, vendedór sira sei aluga tan fatin, sei selu impostu no ida ne’e sei laiha rendimentu ekstra ba sira. Ida ne’e mós hanesan dezafiu boot ida.

Sitorus promete katak Estadu Indonézia sei serbisu hamutuk ho Governu Timor-Leste atu oinsá labele rezolve problema ida ho maneira hamosu fali problema foun.

Tanba, Sitorus rona rasik husi vendedór sira katak sira-nia rendimentu iha variasaun, balun hetan $1.500, balun $1000 no balun $300 de’it kada fulan.

Nia mós rona rasik katak balun hakarak atu fila hikas ba Indonézia. Situasaun ne’e halo nia triste bainhira problema ne’e akontese duni, tanba kampu traballu sei menus, nune’e mós sira ne’ebé fó aluga rai no uma sei lakon rendimentu.

Tanba ne’e, dala ida tan, Sitorus tenik, seidauk tarde atu Governu prepara uma simples ne’ebé di’ak atu bele redúz problema.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here