Sekretária Estadu Igualdade no Inklusaun, Maria José da Fonseca Monteiro de Jesus. Imajen/ António Goncalves

DILI, 07 outubru 2029 (TATOLI)- Sekretaria Estadu Igualdade no Inkluzaun (SEII),  Maria José da Fonseca Monteiro de Jesus, husu ba Asosiasaun Feto Munisípiu Dili (AFEDIL) atu hala’o serbisu ba interese feto hotu iha Munisípiu Dili nian.

Notísia Relevante : AFEDIL Preokupa Ekonomia La Suporta Feto

SEII apresia tebes ho kongresu da-ruak AFEDIL nian ne’e ne’ebé envolve maioria feto potensiál sira husi interministeriál, organizasaun MOFFE, Patria no CAUCUS.

“Ita hakarak Asosiasaun Feto Potensiál kontinua eziste atu fó mahon ba feto hotu iha Munisípiu Dili,” hateten Sekretaria Estadu Maria José da Fonseca Monteiro de Jesus, ohin, iha ámbitu  kongresu da-ruak AFEDIL nian iha salaun Ministériu Solidariedade Sosiál no Inkluzaun (MSSI), Caicoli, Dili.

Notísia Relevante : AFEDIL Hala’o Kongresu ba Da-ruak

Nia fó sasin katak, kongresu asosiasaun potensiál feto iha influensia boot. Ho nune’e duni maka iha eleisaun suku iha 2016 no konsege iha mudansa no hasa’e reprezentasaun lideransa suku nian.

SEII kontinua alerta ba kongresista sira katak feto iha poténsia boot nune’e haree dezeña ba kapasitasaun tuir ida-idak nia nesesidade hodi prepara aan ba prosesu dezenvolvimentu.

“Ita feto la’ós parseira de’it ba mane iha família uma laran, maibé ita hakarak sai parseira mane nian ba prosesu tomak iha dezenvolvimentu,” hateten Maria José da Fonseca Monteiro de Jesus.

MOFFE TL apoia AFEDIL

Diretora Movimentu Feto Foin Sa’e Timor-Leste (MOFFE), Yasinta Lujina. Imajen/Osória Marques

Husi sorin seluk, Diretora Movimentu Feto Foin Sa’e Timor-Leste (MOFFE), Yasinta Lujina, hateten,  sira nia parte hamutuk ho organizasaun feto hotu ne’ebé ejiste iha timor, inklui SEII kontinua fó apoia ba AFEDIL atu bele atinje nia objetivu polítika atu sai mahon ba interese feto nian iha Munisípiu Dili.

“Ita presiza duni afirma ita feto sira nia konviksaun atu prepara-an atu hasoru prosesu desentralizasaun,” hateten Yasinta Lujina.

MOFFE durante ne’e mós fó apoiu no advokasia ba organizasaun feto iha munisípiu hotu-hotu.

MOFFE fiar katak inan feton sira ne’ebé mak sei eleitu ba estrutura foun AFEDIL bele  hatudu vontade no matenek hodi kontinua fali serbisu ba interese feto sira nian atu promove feto iha dezenvolvimentu nasionál.

Jornalista : Osório Marques

Editór       : Francisco Simões

HAKEREK NO HATÁN

Please enter your comment!
Please enter your name here