Ilustrasaun kona-ba prevensaun TBC

DILI, 07 outubru 2019 (TATOLI)-Xefe Programa Nasionál Tuberkuloze, Ministeriu Saúde (MS), Sidonio Lopes informa katak durante loron tolu, hahú husi loron 1 to’o loron 3 outubru ne´e sira identifika problema tuberkuloze hamutuk ho parseiru internasionál sira no profisionál saúde husi munisípiu kona-ba komunidade sira ne’ebé durante hasoru tuberkuloze iha Timor-Leste (TL) no oinsá responde problema ida ne’e, intervensaun saida mak define hodi fó solusaun ba problema ne’ebé mak iha.

“Problema ne’ebé ami identifika iha loron tolu ami halo planu estratéjiku nasionál tuberkuloze ho aprosimasaun enkuadramentu. Primeiru ami deskobre mak liuliu ba komunidade ninia koñesimentu kona-ba moras tuberkuloze hodi bele asesu lalais ba sentru saúde,” dehan Xefe Programa Nasionál Tuberkuloze, MS, Sidonio Lopes ba Ajénsia TATOLI iha Eis-SPK (Sekola Pendidikan Keperawatan), Lahane, ohin.

Segundu, tuir nia katak ita hare jeografikamente populasaun barak mak hela dook transporte mós difisil atu asesu no mós kondisaun estrada. Ida ne’e mós hanesan barreira ida ne’ebé susar tebes ba komunidade atu asesu fasilidade saúde.

Terseiru, problema ida ne’ebé ami identifika mak komunidade la iha osan para selu karreta atu ba fasilidade saúde mezmu sira hakarak ba maibé osan mak la iha entaun sira la bele ba .

“Problema seluk ne’ebé ami indentifika mak liga ho fasilidade saúde no mós ami identifika barak no ami intervensaun mak define ona atu tau iha périodu 2020 to’o 2024,” haktuir Xefe Programa Nasionál Tuberkuloze, Ministeriu Saúde, Sidonio Lopes.

Nia relata katak orsamente ne´ebé sira atu tau iha périodi 2020 – 2024 mak ida ne’ebé iha komitmentu ona mak orsamentu husi fundu globál no agora dadaun fundu globál iha ne’e mak 2018, 2019 2020. “Totál orsamentu ba tinan tolu ne’e hamutuk 4,8 milhões ne’ebé mak apoiu husi doadór fundu globál nian”.

Tuir Sidonio, atu aloka orsmentu ba iha 2020 hamutuk millaun 1. 2, osan hirak ne’e husi fundu doadór sira maibé seidauk sufisiente ba servisu di´ak hodi redús tuberkuloze iha Timor-Leste tanba estimasaun ne’ebé mak  sira halo ne’e, tinan ida ne’e pelo menus millaun 4 até 5 para halo atividade ne’ebé di´ak hodi halo intervensaun ne’ebé mak rigorozu atu redús tuberkuloze.

“Se ita osan mak la sufisiente hanesan ne’e ita labele redus tuberkuloze iha Timor-Leste tanba ne’e mak ami halo planu ida ne’e, planu estratéjiku ne’e sai hanesan dokumentu formál para ami koalia ho governu liuhusi Ministeriu Saúde para mobiliza rekursu finanseiru ne’ebé sufisiente para halo progrma ida ne’e di´ak liután atu nune’e ita bele salva komunidade ne’ebé mak enfrenta ba moras tuberkuloze ne’e”.

Nia dehan, atu redús oras tuberkoloze ne’e ita hatene agora daudaun populasaun rihun atus ida pelo menus nia númeru ne’ebé mak iha kuaze 498 kada populasaun rihun atus ida mak sofre ba moras tuberkoloze. Se ita haree ba nia númeru absoluta kada tinan tinan pelo menus 6.500 ba leten mak sofre tan ona ba moras tuberkoloze no mós 1.400 ne’ebé mak mate kada tinan iha Timor-Leste.

“Atu redus taxa tuberkuloze ida ne’e, ita halo servisu ne’ebé todan, ita tenke iha enerjia, ita tenke rekursu ne’ebé sufisiente. Se ita hakarak redús kada tinan-tinan osan um millaun ne’e susar loos atu redús,” konsidera Xefe Programa Nasionál Tuberkuloze, MS, Sidonio Lopes.

Tuir xefe ne´e, polítika ne’ebé define no estratéjika ne’ebé iha atu redús tuberkuloze iha Timor-Leste ne’e importante. Tuberkuloze mosu tanba liga ho sosio-ekonomia hanesan ema ne’ebé ki´ak, hela fatin ladi´ak, alimentasaun laduun di´ak, orsamentu ne’ebé la iha hodi selu trasporte atu ba fasilidade saúde bainhira sira moras.

Entaun politika ne’ebé atu diak hodi redús primeiru ita tenke eleva komunidade ninia ekonomia. Agora atu eleva komunidade nia ekonomia ne’e la´ós husi Ministeriu Saúde nia serbisu.

“Tanba ne’e mak ami mós koalia kona ba multisetorál atu redús tuberkuloze iha Timor-Leste ne’e ita tenke iha asaun multisetoriál katak setór hotu-hotu halo ninia parte para redús tuberkuloze iha Timor-Leste tanba sosio-ekonomia ne’e la´ós Ministeriu Saúde mak atu rezolve ne’e husi ministeriu relevante seluk mak rezolve”.

“Alende moras tuberkuloze ne’e sai hanesan alarma ba ita hotu tanba ne’e mak presiza tenke hadi´a planu estratejia ida ne’e hodi bele sai, define nia intervensaun ne’ebé rigorozu atu bele sai servisu di´ak liután hodi bele redús moras tuberkuloze iha nasaun ida ne’e,” nia konklui.

Notísia relevante:TBC Hamate Ona Ema Na´in Neen Iha Klínika Bairru-Pité

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here