Primeiru-Ministru, Taur Matan Ruak ho Jenerál Forsa Defeza Koreia Súl, Lee Seokgu, kaer liman hafoin ramata soru-mutuk, iha Paláçio do Governo, Dili, segunda (07/10/2019). Imajen/TATOLI

DILI, 07 outubru 2019 (TATOLI) – Atu selebra tinan 20 destakamentu forsa Koreia Súl iha Timor-Leste (TL) ajuda konstrusaun Estadu no Misaun Pás iha tinan 1999, delegasaun Ministériu Defeza Koreia Súl, ohin, hasoru Primeiru-Ministru, Taur Matan Ruak, hodi koordena asuntu ne’e.

“Ha’u mai Timor ho aviaun militár. Mai atu komemora tinan 20 destakamentu forsa Koreia Súl nian iha Timor-Leste,” dehan Tenente Jenerál Forsa Defeza Koreia Súl, Lee Seokgu, ba jornalista sira iha Paláçio do Governo.

Nia haktuir, forsa hirak ne’e durante mai Timor-Leste ba uluk iha Munisípiu Lautém no Oé-Cusse.

“Hosi forsa hirak ne’e, na’in lima mak lakon sira-nia vida iha Oé-Cusse durante sira hala’o serbisu. Entaun, ami hanoin hikas ami-nia ema na’in lima ne’ebé mate ne’e no responsabiliza nafatin. Ne’e mak horsehik ami to’o iha Dili liu kedas ba Oé-Cusse hodi selebra memória sira na’in lima nian,” nia haktuir.

Nia dehan, tinan 20 liubá, Koreia apoiu povu Timor ba independénsia. Agora, Korea kontinua apoiu Timor-Leste iha área dezenvolvimentu ekonomia.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here