Enkarregadu Negósiu Embaixada Japaun iha Timor-Leste, Shingo Higashimoto, hala'o enkontru ho Xefe Estadu, Francisco Guterres Lú Olo, segunda ne'e. Imajen Mídia PR

DILI, 07 outubru 2019 (TATOLI) – Kanselamentu viajen Prezidente Repúblika (PR), Francisco Guterres Lú Olo ba Japaun, la fó impaktu negativu ba relasaun bilaterál.

Enkarregadu Negósiu Embaixada Japaun iha Timor-Leste, Shingo Higashimoto konsidera laiha impaktu negativu tanba ida-ne’e hanesan asuntu internu no nia espera Estadu Timor-Leste bele rezolve ho di’ak situasaun ne’e iha tempu badak.

Lee mós: PN La Autoriza Viajen PR Lú Olo ba Indonézia no Japaun

Shingo Higashimoto hato’o konsiderasaun ne’e, hafoin hasoru malu ho Xefe Estadu Lú Olo iha Palásiu Prezidente Nicolau Lobato, Bairru Pité, ohin.

“Se ita temi dehan impaktu negativu, ne’e lae. Ha’u bele dehan katak desizaun ida ne’e sei la fó impaktu ba ita-nia relasaun bilaterál”, enkarregadu ne’e subliña.

Nia haktuir liután kona-ba rezultadu enkontru ho Prezidente Repúblika, katak, Xefe Estadu hato’o nia agradesimentu no disponibilidade atu atende konvite ne’ebé nia simu maibé labele partisipa, tanba maioria membru Parlamentu Nasionál hosi koligasaun Aliansa Mudansa ba Progresu (AMP), la aprova nia pedidu dezlokasaun ba Japaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here