Vise Xefe Bankada FRETILIN, Francisco Miranda Branco. Imajen Tatoli/Egas Cristóvão

DILI, 07 outubru 2019 (TATOLI) – Komisaun A (trata Asuntu Justisa no Konstitusionál) oras ne’e daudaun suspende diskusaun projetu Lei Antí-Korrupsaun (LAK) tanba haree ba artigu ne’ebé barak no ajenda Parlamentu Nasionál (PN) tinan ne’e.

Artigu iha LAK tuir informasaun sei to’o artigu 100 resin ne’ebé hosi inísiu artigu 47, enkuantu resesu foin lalais, Komisaun A konsege halo diskusaun to’o iha artigu 22 iha kapítulu dahuluk.

Notísia Relevante: Prezidente Komisaun A Rekoñese Difísil Finaliza LAK Tinan ne’e

Haree ba kestaun ne’e, Vise Xefe Bankada FRETILIN, Francisco Miranda Branco, konsidera diskusaun LAK bainhira la’o ho efetivu depende Bankada Governutanba sira mak maioria.

“Maioria mak tenke sériu. Ha’u hanoin la kusta buat ida kuandu iha ona vontade polítika maka tinan ne’e bele ramata maibé vontade polítika laiha ne’e halo nusá? Tanba ne’e buat hotu fila-fali de’it ba vontade polítika Governu nian atu hala’o polítika luta kontra korrupsaun”, tenik Branco iha PN, segunda ne’e.

Nia dehan, bainhira laiha vontade polítika husi parte hotu maka LAK sei kontinua hakdasak nafatin.

“Tinan ba tinan ita nafatin hela hanesan ne’e. Ita atu proteje korruptór ita la hatene tanba ne’e ami sei ejize nafatin hodi aselera diskusaun”, nia akresenta.

Deputadu opozisaun ne’e haree iha nesesidade atu introdúz tan artigu ida kona-ba bens interese governante no ema hotu ne’ebé hala’o kna’ar iha instituisaun estadu nian.

Nia subliña, Bankada FRETILIN sei esforsu karik tinan ida ne’e la konsege finaliza LAK, maka tinan 2020 iha trimestre dahuluk Timor-Leste tenke iha ona LAK hodi bele kombate korrupsaun.

Branco konsidera bainhira Timor-Leste laiha LAK fásil liubá governante sira halo korrupsaun (enrekesimentu ilísitu).

Enkuantu, Vise Prezidente Parlamentu Nasionál, Luís Roberto, konsidera LAK importante tebes ba nasaun ida hodi bele kombate korrupsaun.

“Ita hotu-hotu hakribi korrupsaun. Ha’u hakarak hateten katak ami Partidu KHUNTO sempre prontu atu aprova lalais lei ne’e no bainhira iha ona ajenda ami prontu”, dehan Deputadu Bankada KHUNTO ne’e.

Entretantu, iha loron 9 jullu 2018, deputadu na’in-10 husi bankada opozisaun FRETILIN no PD aprezenta ba meza projetu LAK no anúnsiu iha plenária loron 10 jullu 2018, no iha loron hanesan baixa ba Komisaun A atu hetan relatóriu pareser.

Iha loron 20 fevereiru 2019, komisaun A hahú konvida entidade kompetente sira hanesan Mimistériu Públiku, Banku Sentrál, Ministériu Justisa, Komisaun Antí-Korrupsaun (KAK), Provedoria Direitu Ema-Nian no Justisa (PDHJ-sigla portugés), Majistratura Judisiária, Dekanu Fakuldade Universidade Nasionál Timor Lorosa’e (UNTL), Universidade Dili (UNDIL) no sosiedade sivíl hanesan LABEH, JSMP, CEPAD, Luta Hamutuk, La’o Hamutuk no Fundasaun Mahein, atu halo audiénsia públika.

Nune’e, iha loron 18 marsu 2019, PN liuhosi sesaun plenária segunda halo diskusaun no votasaun iha jeneralidade ba testu substitutivu projetu lei númeru 1/V(1a) Antí-Korrupsaun ho votu maioria a-favór 47, kontra 0 no abstensaun 0, no liuhosi plenária deside halo diskusaun espesialidade iha Komisaun A.

Antes ne’e, iha loron 1 juñu 2011, Komisaun A simu admisaun esbosu LAK hodi rona ideia no rekomendasaun husi parte kompotente sira husi instituisaun estadu no sosiedade sivíl sira, maske nune’e lei ne’e la konsege hetan aprovasaun no revizaun signifikante.

Lei ne’e rasik la konsege halo diskusaun to’o kaduka tanba situasaun impase momentu ne’ebá.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here