Ró Coralexpeditions Australia’s Pioneering Cruise Line husi nasaun Austrália ho totál pasajeiru 100-resin vizita sítiu turístiku iha Timor-Leste. Imajen/Florencio Miranda Ximenes.

DILI, 05 outubru 2019 (TATOLI) – Ró Coral-expeditions Australia’s Pioneering Cruise Line ho turista 82, ohin, vizita sítiu turistiku sira iha Timor-Leste.

“Ita ohin, hetan vizita tan ró kruzeiru Coral-expeditions luxu ho pasajeiru ka turista 82 maioria husi Austrália balun husi Inglaterra”, Diretór Jerál Turizmu Ministériu Turizmu, Komérisu no Indústria (MTKI), José Filipe Dias Quintas, hatete iha portu Dili, ohin.

José Quintas dehan, turista husi ró ne’e hala’o vizita ba Muzeu Rezisténsia, merkadu tais sira no balun ba Santa Krús.

“Turista sira mai vizita ne’e hatudu katak promove fatin turístika Timor-Leste ba mundu ho seguru tebes no hakmatek la halimar”, katak.

Tuir nia, bazea ba dadus MTKI hatudu turista vizita Timor-Leste kuaze rihun 4, maibé iha tinan ne’e sa’e ba rihun 5-resin.

“Ita haree pozitivu tebes husi kontestu númeru tanba ho ró kruzeiru ne’e turista loloos mai atu holiday no gasta osan Iha Timor-Leste”, katak.

Haree husi vantajen ekonómiku, José Quintas friza turista sira bá vizita merkadu tais sira hodi hola sasán artezanatu no produtu lokál sira no fó mós benefísiu ba transporte lokál sira.

Tanba ne’e, nia dehan Timor- Leste presiza hadi’a ona kondisaun hodi fasilita ona turista sira ne’ebé vizita ho ró kruzeiru sira.

“Ita presiza hadi’a ona terminál portu ne’e ho fasilidade sira hanesan toilet atubele fasilita turista sira mai vizita ita-nia rai”, sujere.

Rute ró ne’e, husi Darwin mai Timor-Leste no bá fali Raja Ampat-Papua, Indonézia. Enkuantu ró ne’e iha Timor-Leste durante oras ulau.

Ró Coral-expeditions Australia’s Pioneering Cruise Line ne’e konstrui iha Vaung Tau, Vietnam ho naruk metru 94/308 ft no luan metru 17/ 56 ft ho tripulante sira inklui pasajeiru hamutuk 120.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here