Ekipa Lalenok United FC selebra sira-nia vitória, hafoin halakon Assalam FC liuhusi penalidade. Imajen Mídia LFA

DILI, 05 outubru 2019 (TATOLI)–Lalenok United FC hakat ona ba finál Tasa 12 Novembru époka 2019, hafoin halakon Assalam FC liuhusi penalidade iha Estádiu Munisipál Dili, ohin.

Golu dahuluk Lalenok United FC nian atribuidu liuhusi auto golu (gol bunuh diri-termu Indonézia) mai husi jogadór Assalam, Husein Ramos iha minutu 15.

Entretantu, golu Assalam FC nian marka hosi jogadór Prince Boateng iha minutu 29. To’o jogu primeira parte ramata, laiha tan golu ruma ne’ebé marka hosi Assalam.

Iha jogu segunda parte, Lalenok United FC prodúz tan golu ida liuhusi jogadór Ismael Adam iha minutu 68. Lakohi lakon, Assalam FC prodúz mós golu daruak nian hosi jogadór Osório Gusmão iha minutu 88 to’o oras jogu nian termina ho skore 2:2.

Rezultadu hosi jogu segunda parte ne’e lori ekipa rua koko sorte ho penalidade, ne’ebé rezultadu finál entre Lalenok United Vs Assalam FC 6:4.

Hafoin jogu terminadu, kapitaun ekipa Lalenok FC, Helder Valente konsidera ekipa Assalam nu’udar ekipa ne’ebé forte, maibé ho sira-nia serbisu hamutuk konsege lori ekipa Lalenok hakat ba finál.

Kapitaun ekipa ne’e mós fiar katak ho serbisu humutuk ne’ebé di’ak, Lalenok United FC sei sai kampiaun iha Tasa 12 Novembru époka 2019.

Helder mós otimista no promete sei kontinua lidera ekipa ne’e, liliu sei organiza jogadór sira atu disiplina iha treinu hodi bele hadi’a di’ak liután jogu iha kompetisaun sira tuir mai.

Nune’e mós, jogadór avansadu hosi Assalam FC, Fransyatma Kefi rekoñese katak maski ekipa rua iha forsa ne’ebé hanesan, maibé sorte mak laiha.

“Failansu hosi ami-nia ekipa mak ladún serbisu hamutuk tanba durante ne’e ami la treinu hamutuk”, Kefi haktuir.

Jogu ne’e dirije hosi árbitru Francisco Pereira, juiz liña primeiru mak Filomeno da Silva no juiz liña segundu mak Elísio Lopez.

Tuir planu, domingu, 6 outubru 2019, sei iha kontinuasaun jogu meia finál entre AD SLB Laulara ho Boavista FC Timor hodi buka tama finál hasoru Lalenok United FC.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here