Jestór Rádiu Komunidade Kolelemai Bucoli, Saturnino Matos da Silva, hala’o soru-mutuk ho Sekretáriu Estadu Komunikasaun Sosiál, Merício Juvinal dos Reis ‘Akara’, iha salaun Rádiu Komunidade Bucoli. Imajen/Hortençio Sanchez

BAUCAU, 05 outubru 2019 (TATOLI) – Jestór Rádiu Komunidade Kolelemai Bucoli, Saturnino Matos da Silva, husu ba Governu bele tau atensaun di’ak liu iha parte ekipamentu tanba durante ne’e fasilidade servisu iha Rádiu ne’e seidauk sufisiente.

Nia hato’o lia hirak ne’e durante simu vizita husi Sekretáriu Estadu Komunikasaun Sosiál, Merício Juvinal dos Reis ‘Akara’, akompaña hosi Prezidente Rádiu Televizaun Timor-Leste (RTTL), Francisco da Silva Gari, Vise Prezidente Agência Tatoli, Manuel Pinto no Diretór Nasionál Rádiu Komunidade (CRC-sigla portugés), ne’ebé haree diretamente kondisaun rádiu refere.

“Antes ne’e ami iha parseiru barak mak fó apoiu ami maibé agora laiha ona. Entaun, ami hatama ona proposta ba Governu iha tempu liubá hodi husu apoiu materiál servisu-nian. Ami fiar proposta ne’e pasa hodi tulun ami-nia rádiu ne’e”, tenik Saturnino bainhira hala’o soru-mutuk ho ekipa Sekretaria Estadu Komunikasaun Sosiál (SEKOMS) iha salaun Rádiu Komunidade Kolelemai, Bucoli, Baucau, sábadu ne’e.

Edifísiu Rádiu Komunidade Kolelemai Bucoli. Imajen/Hortençio Sanchez

Nune’e mós, nia parte husu ba Governu atu bele tau-matan ba kapasitasaun jornalista sira ne’ebé mak daudaun ne’e serbisu voluntáriu hela iha Rádiu ne’e.

Nia haktuir, jornalista sira ne’ebé durante ne’e hala’o kna’ar iha Rádiu Matebian ladún iha esperiénsia kle’an ba área jornalizmu.

Hatán ba preukupasaun hirak ne’e, Sekretáriu Estadu Akara, hateten Governu kontinua fó apoiu maibé haree mós ba progresu rádiu komunidade sira tanba kada tinan Governu prevee osan hodi fó apoiu ba rádiu komunitáriu iha munisípiu hotu.

“Governu la’ós atu fó apoiu de’it ba rádiu komunidade sira, maibé sei haree uluk lai ezisténsia rádiu ne’e iha duni progresu ka lae”, tenik Akara.

Governante ne’e hatutan: “Ha’u vizita rádiu barak ona maibé ami sei diskute kle’an liután nune’e bele fó apoiu ka lae. Vizita sira ne’e nia objetivu finál iha maibé ami sei diskute hafoin bele foti desizaun ruma”, nia akresenta.

Nia dehan, bainhira Governu aloka ona orsamentu ba rádiu komunidade sira, jestór rádiu tenke jere ho di’ak.

Jornalista ne’ebé durante ne’e serbisu iha Rádiu Matebian Baucau hamutuk na’in-neen no jestór ida.

Governu liuhosi Sekretaria Estadu Komunikasaun Sosiál kada tinan prevee orsamentu ba rádiu komunidade sira. Iha tinan 2019, orsamentu ba rádiu komunidade sira hamutuk $491,000.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here