efe Alfándega Aeroportu Suai, Nuno Nogueira. Imajen TATOLI: Eugénio Pereira

COVALIMA, 04 Outubru 2019 (TATOLI)-Servisu Alfándega Munisípiu Covalima kontinua hala’o kontrolu ba movimentu ativdade tama sai iha Aeroportu Internasionál Komandante-Em Xefe Das FALINTIL, Kay Rala Xanana Gusmão, dezde inaugura too agora la’o di’ak.

Aeroportu ne’e, hahú simu voo internasionál dahuluk hodi simu aviaun ida ne’ebé sei semo mai hosi Darwin, Austrália,  hafoin Prezidente Repúblika, Francisco Guterres Lú Olo inaugura iha loron 26 Juñu 2017.

“Servisu Alfándega kontrolu ita-nia aeroportu ne’e la’o di’ak, ita iha Elikópteru rua (2) no Aviaun Jet husi  Northern Oil & Gás Austrália (NOGA) ba operasaun transporte ba rekursu umanu ba plataforma petrolífera no Tasi Timor,” informa  Xefe Alfándega Aeroportu Suai, Nuno Nogueira ba Ajénsia TATOLI iha nia servisu fatin.

Kompañia Austrália NOGA ne’ebé simu ona autorizasaun espesiál ida hosi Autoridade Aviasaun Sivíl de Timor-Leste (AACTL) hodi asegura, hadi’a daudauk ona kondisaun seguransa sira ne’ebé importante hodi realiza ligasaun entre Darwin no Suai.

Alende ida ne’e, parte Alfándega mós durante ne’e halo kontrolu ba aviaun ZEESM-TL ne’ebé tula pasajeiru husi Dili ba Covalima no Covalima ba Dili.

“Aviaun ZEESM-TL mós loro-loron tuun tula pasajeiru nakonu maioria tula Xineza sira ne’ebé halo servisu ba projetu sira ne’ebé implementa iha Suai no Timoroan sira ne’ebé hela  iha Suai,” nia hatete.

Atu kontrola Aeroportu Suai, hale’u besik kilómetru 15 hosi sidade Suai  ho pista ho luan 1.500 metru no instalasaun ne’ebé modernu hodi simu pasajeiru sira no apoiu ba navegasaun nian, tuir nia, ba futuru presiza aumenta tan rekursu umanu.

Nuno hatutan, nia parte rasik  hato’o ona proposta ba Alfándega Dili hodi prevee orsamentu iha tinan 2020 hodi rekruta tan númeru membru Alfándega foun.

“Ami na’in haat (4) maka servisu iha ne’e la sufisiente,  ha’u halo ona pedidu para aumenta pesoál, maibé Diresaun Jerál Alfándega dehan hein ituan, tanba no ba oin governu presiza aumenta  mós fasilidade servisu para kontrola Aeroportu ne’e oras 24,” nia esplika.

Entretantu durante fulan hitu, (7), Marsu too Setembru 2019, Alfándega konsege rekolla taxa hamutuk rihun $1000.

“Ita foin rekolla taxa daudaun ne’e $1000 la’ós  ba sasán komersiál, maibé ekipamentu sira ne’ebé tula pertense ba aviaun nian mak selu,” nia informa.

Aeroportu tasi mós monta iha mákina X-Ray hodi halo kontrolu ba sasán sira ne’ebé pasajeiru ka traballadór sira lori husi Austrália mai Timor-Leste.

Nia husu ba governu atu instala mós ekipamentu rede ínternet hodi fasilita servisu, tanba servisu loro-loron funsionáriu sira uza de’it moden ínternet.

Entretantu, instalasaun Aeroportu ne’e inklui terminál foun, torre kontrolu, kuartél ba Bombeiru sira, Estasaun Metrolójika no Elikópteru ne’ebé halo servisu evakuasaun liuhosi ambulánsia aérea. Identifika ona iha Planu Estratéjiku Dezenvolvimentu Nasionál 2011-2030, nesesidade atu haluan no rekupera fali pista antigu Suai nian no harii instalasaun foun no modernu sira.

Aeroportu ne’e permiti mós aumenta komunikasaun nasionál no promove dezenvolvimentu ba Kosta Súl hodi apoia atividade sira ne’ebé iha relasaun ho petróleu no minerál, agrikultura, turizmu, saúde no seguransa.

Ligasaun ida-ne’e sei loke dalan atu empreza ne’ebé instala nia baze operasaun iha Suai, favorese dezenvolvimentu ekonómiku ba rejiaun ne’ebá.

Aeroportu ne’e halo gasta orsamentu ho montante U$67,687,412.46 konstrui husi Kompañia Estatál Indonézia, PT. Waskita Karya no fiskaliza husi Konsul tan Jurutera Perunding Zaaba.

Implementa Ona Programa ASYCUDA  World 

Entretantu, Alfándega Covalima mós implementa ona programa ASYCUDA  World  iha loron 13 Marsu 2019.  ASYCUDA  World nu’udar sistema informatizadu kona-ba jestaun aduaneira ne’ebé kobre prosedimentus komérsiu hosi rai li’ur nian. Sistema ne’e manifestu deklarasaun aduaneiras ho nia prosedimentus tránzitu no maneira kona-ba suspende nian. Programa ne’e rasik ASYCUDA dezenvolve iha Jenebra hosi UNCTAD.

Timor-Leste ofisialmente aplika sistema ne’e liuhosi aprovasaun Rezolusaun iha ámbitu VI Governu Konstitusionál iha loron 25 Abril 2017 liuhosi reuniaun Konsellu Ministru ne’ebé hato’o hosi Eis Vice Ministru VI Governu Konstitusionál, Hélder Lopes.

Programa ASYCUDA nu’udar programa introdusaun informatiza saun hodi simplifika kona-ba prosedimentu hodi minimiza kustu administrativus ba emprezariál sira. Nune’e mós hodi bele aumenta reseita aduaneira, ne’ebé sai kontribuinte prinsipál ba orsamentu estadu nian.

Hodi bele aumenta kapasidade atendementu liuhosi aplikasaun sistema ne’e, VIII Governu Konstitusionál, liuhosi Ministériu Finansas kontinua reforsa liuhosi instalasaun aparellu ASYCUDA ne’ebé lidera hosi Autoridade Aduaneira iha Aeroportu Kay Rala Xanana Gusmão

Jornalista : Eugénio Pereira

Editór        : Rafy Belo

HAKEREK NO HATÁN

Please enter your comment!
Please enter your name here