Enkontru entre komitiva Sekretáriu Estadu Komunikassun Sosiál, Merício Juvenal dos Reis Akara, ho jestór Rádiu Komunidade Viqueque. Imajen Tatoli/Hortençio Sanchez

VIQUEQUE, 4 outubru 2019 (TATOLI)–Sekretáriu Estadu Komunikasaun Sosiál, Merício Juvenal dos Reis Akara akompañadu hosi Diretór Nasionál Sentru Rádiu Komunidade (CRC-sigla Portugés), Abel da Conceição, Prezidente RTTL. EP, Francisco da Silva Gari no Vise Prezidente Agência Tatoli, Manuel Pinto, hala’o soru-mutuk ho Diretór Rádiu Komunidade Viqueque, Florindo de Jesus.

Objetivu hosi soru-mutuk ne’e atu troka hanoin Governu nian ho Konsellu Rádiu Komunidade no jornalista sira hotu ne’ebé serbisu iha rádiu refere.

Tanba ne’e, Diretór Rádiu Komunidade Viqueque,  Florindo de Jesus informa durante tinan barak nia laran Rádiu Viqueque hasoru dezafiu barak.

“Fatin la favorável ona para ami hala’o serbisu. Tempu udan entaun ami hasoru problema boot tanba uma ne’ebé uza la sufisiente. Dalaruma tempu udan, udan tama to’o laran,” dehan diretór ne’e iha Viqueque, ohin.

Entretantu, reprezentante Administradór Munisípiu Viqueque, Cosme Sarmento agradese ba vizita Sekretáriu Estadu Komunikasaun Sosiál ho ekipa hala’o nune’e bele haree direta situasaun reál Rádiu Komunidade Viqueque hasoru.

“Hanesan autoridade lokál sente orgullu no agradese tebes ba vizita ne’ebé mak Sekretáriu Estadu Komunikasaun Sosiál ho ekipa hala’o hodi haree direta ami-nia rádiu ida-ne’e. Ami fiar katak ba oin bele hetan apoiu ruma atu jornalista sira iha fatin ne’e hodi hala’o serbisu di’ak liután,” dehan Cosme.

Hatán ba preokupasaun hirak ne’e, Sekretáriu Estadu Komunikasaun Sosiál, Merício Akara hateten Governu kontinua apoiu meiu komunikasaun sosiál hotu.

Nia dehan, maibé agora Governu tau importánsia uluk ba mídia Estadu nian ba interese públiku. Maibé, ba mídia privadu, Governu kontinua halo parseiru hanesan oferese formasaun ba jornalista no seluk-tan.

“Politika Governu nian iha komunikasaun sosiál ita kontinua tau atensaun. Tanba, agora ne’e, informasaun hanesan xave. Mídia importante tanba hosi Viqueque bele asesu informasaun hotu iha Timor laran no mundu. Informasaun sira mós bele sai data ba nasaun tanba nasaun ida tenke iha dadus atu nune’e ba oin ema sira bele uza fali hodi halo planu oinsá mak dezenvolve fali nasaun,” tenik Akara.

Tanba ne’e, tinan 2019 ne’e, Governu aloka ona orsamentu hamutuk rihun $240 ba Rádiu Komunidade hamutuk 16 iha Timor laran.

Maibé, orsamentu 2020 Governu kontinua fó nafatin subsídiu ba Rádiu Komunidade sira.

“Tinan oin, osan ba Rádiu Komunidade sira hamutuk rihun $255 ba Rádiu Komunidade hamutuk 17. Osan sira ne’e ita-boot sira mak tenke jere halo didi’ak hodi haree atu atende nesesidade rádiu nian ka oinsá. Governu kontinua apoiu ita-boot sira no ita-boot sira mós tenke esforsu halo serbisu maka’as,” tenik Akara.

Enkuantu, jornalista hosi Rádiu Komunidade Viqueque hamutuk 6 no jestór ida mak durante ne’e hala’o hela serbisu iha rádiu refere.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here