Ministra Finansa ein ezersísiu, Sara Lobo Brites. Foto: Media MF.

DILI, 04 outubru 2019 (TATOLI) – Ministra Finansa ein funsaun, Sara Lobo Brites, orgullu tebes tanba Autoridade Tributária (AT) estabelese no dezenvolve ona portál ho objetivu atu ajuda kontribuinte sira bainhira selu impostu fiskál.

 “Nu’udar Ministra Finansa interina ha’u sente orgullu tanba portál ne’e hanesan produtu ida ne’ebé dezenvolve rasik hosi ekipa Autoridade Tributária nian. Produtu ne’e ajuda tebes liuliu kontribuinte sira bainhira selu sira-nia impostu fiskál. Ne’e ajuda tebes efesiérnsia iha sira-nia tempu no mós kustu”, hateten Sara Lobo Brites iha lansamentu portál AT iha Ministériu Finansa, Aitarak-Laran, ohin.

Atuál Vice-Ministra Finansa ne’e dehan ne’e hanesan portál dahuluk ne’ebé AT estabelese. Antes ne’e kontribuinte ida atu selu impostu tenke ba iha eskritóriu AT nian, foti formuláriu, prienxe maka ba fali selu iha banku, maibé modelu eletróniku ne’e sei ajuda kontribuinte sira la nesesáriu ona halo pratika hanesan uluk, no automatikamente iha de’it sira-nia fatin bele halo submisaun liuhosi portal refere.

“Programa reforma fiskál ne’ebé hahú iha 2015, no iha 2017, konsege transforma Diresaun Jerál Impostu ba Autoridade Tributária, maibé ida ne’e la sufisiente tanba transforma instituisaun ida atu fó kbiit hodi halo funsaun ida di’ak, maibé seidauk hadi’a sistema, prosedimentu maka autoridade sei labele halo nia kna’ar ho didi’ak’, afirma.

Parte seluk tan maka iha rekursu umanu, presiza mós atu fó formasaun adekuada ho nune’e autoridade bele halo nia funsaun ho kredivel, jere kolesaun reseita ho di’ak hodi bele kontribui no dezenvolve Timor-Leste.

Tuir governante ne’e, portál refere hanesan hakat importante ida ba AT iha ámbitu programa reforma fiskál nian hodi moderniza sistema informasaun no teknolojia iha servisu administrasaun nian.

“Benefísiu sira ne’ebé iha la’ós de’it ba Governu, maibé mós ba kontribuinte sira. Ho aplikasaun ne’ebé maka eletróniku sei iha efisiénsia iha tempu, redús iha kustu bainhira kontribuinte sira atu trata sira-nia administrasaun ou asuntu fiskál ne’ebé maka hanesan obrigasaun ba ita hothotu”, katak nia.

Atu asesu ba portál ATTL www.attl.gov.tl.

Notísia relevante : ATTL Estabelese Sistema Impostu Online Hodi Hasa’e Reseita Doméstika

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here