Ministra Finansa en-ezersísiu, Sara Lobo Brites. Imajen/Tatoli.

DILI, 04 setembru 2019 (TATOLI) – Ministra Finansa interina, Sara Lobo Brites, konfirma katak proposta Lei Orsamentu Jerál Estadu (OJE) 2020 nian iha kategoria bens no servisu boot ho totál millaun $738,428 tanba prevee mós atu selu dívida ba kombustivel hamutuk millaun $100-resin.

“Bens servisu iha tinan ida ne’e iha duni aumentu, más iha ne’ebá iha porsaun ida boot ba iha selu gazoél ba iha eletrisidade iha sentrál elétrika Hera no Betanu. Tanba iha 2017, orsamenta de’it ba kombustivel iha sentrál elétrika rua ba fulan neen de’it, entaun lori tiha montante ne’ebé tenke selu iha 2017 mai iha 2018, no iha 2018 mós la konsege selu kompletu, dada mai to’o 2019”, Sara afirma iha Aitarak-Laran, ohin.

Nune’e, foin daudaun iha Komité Revizaun Orsamentu Polítika (KROP), Ministru Obra Públika aprezenta katak iha nesesidade tau osan iha 2020 para bele selu tiha Governu nia obrigasaun ba iha kompañia sira ne’ebé fornese mina ba iha sentrál elétrika rua, ne’ebé sai  hanesan dívida.

Governante ne’e afirma, Governu iha devér atu selu ba empreza sira ne’ebé fornese ona kombustivel tanba sira mós ba foti mina ne’e hosi fali fornesedór seluk, tanba ne’e maka iha tinan 2020 tau osan kompletu hodi bele selu.

“Totál orsamentu 2020 nian rasik ho dívida sira ne’ebé lori husi tinan 2017 hamutuk millaun $100-resin. Ne’e ba de’it atu selu kombustivel, tanba ne’e maka hodi kontribui ba kategoria bens servisu aas. Aléinde ne’e, iha mós servisu seluk Governu hakarak hadi’a hanesan área saúde no área sira seluk ne’e mós kontribui ba iha kategoria ne’e”, dehan Ministra ein funsaun ne’e.

Entretantu empreza ne’ebé fornese kombustivel ba sentrál elétrika Hera no Betanu maka empreza Sacom Energy no Esperansa Timoroan (ETO).

Iha orsamentu 2019 nian kategoria bens no servisu ho totál millaun $472,9 no iha 2018 mak millaun $421,666.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here