Diretora DIFF Lena Lenzen hasai foto hamutuk ho ekipa. Foto TATOLI: Nelia Rosario

DILI, 03 outubru 2019 (TATOLI)—Asistente Produsaun Dili Internasional Film Festival (DIFF), Zelia Ximenes, informa DIFF foin primeira vez halo iha Timor-Leste ne’ebé lori filmaker lokál submete sira-nia filme hitu (7) hodi kompete ho filmaker internasional iha festival ne’e.

“Ami halo festivál iha Timor-Leste tanbá seida’uk iha festivál iha Timor-Leste. Karik antes ne’e iha maibé ida ne’e hanesan eventu ne’ebé ki’ik. Iha abertura ba DIFF nian loke mós kompetisaun ba filmaker Internasionál no mós filmaker lokál. Filmaker lokál submete sira-nia filme totál hitu (7) husi grupu filmaker hotu mak hanesan Nocollide, Grupu Campis Filmakers, Grupu Evergreen, Grupu Protafon, ADTL no Uma Arte no Grupu Fun,” dehan Zelia Ximenes ba Ajénsia TATOLI liuhusi entrevista iha Fundasaun Oriente, kinta (3/10/2019).

Grupu Internasionál sira ne’ebé submete sira-nia filme ba DIFF, nia hatutan, totál hamutuk filme 50 no filme 15 de’it mak tama iha kategoria DIFF nian. Grupu Internasionál sira ne’e mai husi nasaun Portugal, Brazil, Xina, Amerika, Australia, Irak no Iran.

Daudaun ne’e, nia dehan, sira halo Dili Internasionál Festival filme ne’e ba  eventu ne’ebé boot ne’ebé hala’o iha fatin haat hanesan iha Platinum Cineplex Cinema, Fundasaun Oriente, Beachside Cinema no mós Cinema Lorosa’e.

“Ami fó sai la’os filme Internasionál de’it maibé ami mós hatudu filme lokál, filme Timor-Leste hanesan, Balibo Five, Padre de Ataúro. Ida ne’e mak filma ne’ebé ami hatudu iha DIFF ne’e nia laran,” nia dehan.

Aleinde ne’e, nia informa, sira mós halo programa hanesan workshop ba filmaker timoroan sira no segundu workshop sira halo ne’ebé formadór Shogen husi Japaun ne’ebé fó formasaun kona-ba acting no basic acting.

Kona-ba prezente ba filmmaker sira, nia hatán, prezente ne’ebé fó ba manan nai’n filmaker lokál sira hanesan lourus kafé iha símbolu ne’ebé tau iha sira-nia filme. Entretantu, manan na’in ba  primeiru lugar sei heten $500, segundu lugar $250 no terseiru $100.

Nia esplika, manan na’in sira ne’ebé tama iha terseiru klasifikasaun, sira-nia filme sei fó sai iha Sun Theater Melbourn iha Australia.

Nia informa, filme husi filmaker lokál sira-nia títulu filme mak hanesan Anjo Laiha Liras husi Grupu Nocollide, Motivasaun Domin husi grupu Fun, Asaun La’os Karidade husi ADTL. Liberdade La’o ho Responsabilidade husi Evergreen, Luta ba Futuru husi Campis Filamaker, Influénsia Teknolojia husi Protafon no Paizajen Timór husi Grupu Uma Arte.

Jornalista   : Nelia Fernandes

Editor         : Rafy Belo

HAKEREK NO HATÁN

Please enter your comment!
Please enter your name here