Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida. Imajen Tatoli/Evaristo Soares Martins

DILI, 4 setembru 2019 (TATOLI)–Sentru Estudu ba Pás no Dezenvolvimentu (CEPAD-sigla portugés), identifika fatór haat sai obstákulu ba prosesu dezenvolvimentu.

Obstákulu haat ne’e mak hanesan interese privadu no partidu aas liu interese nasionál. Rua, justisa sei fraku  no ema-boot sira kontinua goza impunidade polítika. Tolu, narativu istória seidauk loos. Haat, Korrupsaun, Koluzaun no Nepotizmu (KKN) sei buras.

“Fatuk boot haat (4) ne’e mak sai obstákulu”, Diretór Ezekutivu CEPAD, João Boavida, ba Agência TATOLI, iha nia kna’ar fatin, Bidau Akadiru-hún, Dili, kuarta (2/10).

Nia argumenta, iha Timor hatoman-aan liuhosi tradisaun katak hatán ba ema-boot ruma, ne’e lójiku. Lójiku ne’e dehan loos duni. Hanesan tempu rezisténsia, Komandu Luta mak dirije no organiza funu, maibé tempu independénsia tenke opta ba sistema, lei sira no respeita separasaun podér entre órgaun soberania sira.

“Ita labele hatán fali ba maun-boot ka biin-boot ne’ebé fó projetu mai ita. Nee mak polítika kliantalizmu ka polítika patraun ho kliente. Ida ne’e iha Timor buras tebes. Tanba ne’e mak difikulta ita-nia Planu Estratéjiku Dezenvolvimentu Nasionál hodi hamosu diskriminasaun”, Boavida subliña.

Nia hateten katak situasaun atuál oras ne’e ema sira ne’ebé relasaun di’ak iha sistema mak moris di’ak ba oin. Sira ne’ebé laiha relasaun di’ak, la’o ba kotuk nafatin.

Nia esplika justisa sei fraku no ema-boot sira goza impunidade tanba sei iha intervensaun ba sistema judisiária laran. Ne’ebé, kaer mak ikan ki’ik sira, maibé ikan boot sira sempre sees-aan. Ezemplu hanesan kazu eis Ministra Finansa, Emília Pires.

“Ema-boot sira goza impunidade, entaun presiza hasai imunidade mak sira ba hatán. Lae susar”, tenik nia.

João Boavida afirma, justisa atu la’o di’ak labele iha intervensaun hosi sé de’it.

“Faktu mak ita-boot sira dehan ita-nia justisa sei fraku, maibé sira dehan ne’e denunsiante tiha ona”, katak diretór CEPAD.

Nia salienta, kada tinan Governu foti orsamentu biliaun ida resin hosi fundu mina-rai maibé dezenvolvimentu la la’o, entaun buat ruma la loos.

Nia konsidera katak kada tinan aprova orsamentu hodi mantein de’it mákina burokrátiku Governu nian.

“Ne’e problema iha jestaun, lideransa no iha buat hotu-hotu. Ita-nia planu di’ak maibé implementasaun mak la tuir dalan”, tenik João Boavida.

Nune’e mós, tuir nia, fatór seluk mak iha nesesidede atu hamosu narativu istória ida ho kompreensivu kompletu kona-ba rezisténsia no okupasaun, nune’e hatuur faktu iha nia fatin.

“Kuandu ita laiha istória ida kompletu, ema ida-idak hamriik ejize ninia direitu no nia obrigasaun. Ne’ebé, susar ba Governu atu hatán ba nesesidade timoroan nian tomak”, nia haklaken.

Nia fó ezemplu, impase polítika ohin loron mai hosi kompetisaun lideransa ba sé mak sai na’in ba narativu istóriku.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here