Símbolu partidu KHUNTO. Foto espesiál

DILI, 4 setembru 2019 (TATOLI)–Programa juramentu iha Foho Ramelau, partidu Kmanek Haburas Unidade Nasionál Timor-Oan (KHUNTO), hein solusiona estrutura VIII Governu.

Deputada Bankada KHUNTO, Olinda Guterres, lori KHUNTO nia naran husu katak tenke solusiona lalais estrutura VIII Governu nian para bele fasilita sira atu realiza sira-nia kompromisu eleitorál ne’e (Juramentu iha Foho Ramelau).

“Estrutura Governu ne’e tenke kompletu ona para ami lori ami-nia ema ba juramentu iha Ramelau”, dehan nia iha resintu Parlamentu Nasionál, sesta ne’e.

Deputada ne’e realsa katak bainhira partidu Congresso Nacional da Reconstrução de Timor (CNRT) ho Partidu Libertação Popular (PLP) lakohi, bankada KHUNTO sei ejize nafatin to’o solusiona estrutura VIII Governu.

“Ha’u ko’alia hanesan fundadór partidu no mós hanesan deputada. Governu nia estrutura la kompletu beibeik ne’e labele. Ami prepara tiha ona ema na’in-rua atu kompleta estrutura Governu, maibé seráke CNRT ho PLP nia matenek laiha ona? Dezenvolvimentu tenke la’o. Labele paradu”, Olinda afirma.

Nia argumenta, Primeiru-Ministru, Taur Matan Ruak ho Prezidente Repúblika, Francisco Guterres ‘Lú Olo’, kada semana hasoru malu, nusá mak seidauk solusiona estrutura ne’e.

Iha parte seluk, Vise-Prezidente Bankada CNRT, Patrocínio Fernandes, hateten ema na’in-sia ne’e la troka.

“CNRT nia pozisaun kontinua mantein. Laiha mudansa. Deklarasaun deputada Olinda nian konsideradu hanesan deklarasaun pesoál deputada ida nian. Desizaun hotu-hotu Aliansa Mudansa ba Progresu (AMP) nian liuhosi Konsellu Diretivu. Ha’u hanesan pesoál ida bele fó ha’u-nia opiniaun, maibé ha’u labele foti desizaun lori partidu nia naran”, nia esplika.

Nia hatutan, ema ida labele ko’alia reprezenta opiniaun organizasaun nian.

“To’o minutu ida ne’e, partidu CNRT seidauk simu informasaun iha AMP nia laran katak KHUNTO nia pozisaun mak ida ne’e. AMP nafatin forte”, katak Patrocínio.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here