Prezidente Autoridade Nasionál Petróleu no Minerál (ANPM), Gualdino da Silva. Imajen /Tatoli.

DILI, 04 outubru 2019 (TATOLI) – Prezidente Autoridade Nasionál Petróleu no Minerál (ANPM), Gualdinho da Silva, hateten aprezentasaun bloku iha Simeira Internasionál Mina no Gás hatudu katak Timor-Leste (TL) iha potensialidade ba rekursu naturál.

Iha loron dahuluk simeira ne’e, Estadu TL liuhosi Primeiru-Ministru, Taur Matan Ruak lansa ona konkursu públiku ba mina no gás hamutuk bloku 18, ne’ebé kompostu husi bloku 11 iha tasi no hitu iha rai-maran.

“Kona-ba aprezentasaun ba bloku sira, ita dehan Timor-Leste ne’e nasaun ne’ebé provadu ona katak iha duni rekuru petróleu tanba ita iha ona produsaun. Ita iha ona produsaun husi Kitang, Bayu Undan no iha mós kampu ne’ebé prontu atu dezenvolve no boot tebes mak Greater Sunrise”, tenik Gualdinho ba jornalista sira hafoin enserramentu simeira iha Sentru Konvensaun Dili (CCD-sigla portugés), sesta ne’e.

Notísia Relevante: Timor-Leste Lansa Konkursu Públiku ba Bloku Foun 18

Nia informa, iha mós diskoberta seluk ne’ebé hatudu liuhosi peskiza katak kuaze posu hamutuk 60 mak iha tasi laran.

Prezidente ANPM observa, prezensa kompañia estranjeiru ne’ebé sai ona parseiru dezenvolvimentu TL ne’ebé halo aprezentasaun iha simeira loron rua ne’e ajuda tebes promove rekursu ne’ebé nasaun joven ne’e iha.

“Sira partilla esperiénsia ba bainaka seluk. Espera bainaka sira rona no hatene ona, la’ós de’it timoroan mak ko’alia maibé kompañia internasionál sira ne’ebé halo operasaun iha Timor-Leste mós fó testamuña kona-ba sira-nia esperiénsia katak Timor-Leste la’ós fatin ne’ebé hanesan ema ko’alia oioin iha mídia internasionál maibé fatin ne’ebé mak bele duni simu investimentu internasionál iha área petrolífera”, nia akresenta.

Maski nune’e, nia rekoñese, ba oin ANPM hamutuk ho parseiru relevante sira sei presiza kontinua esforsu-aan atu halo simeira seluk-tan atu promove TL iha investimentu área indústria petrolífera.

Nia orgullu tanba konkluzaun husi aprezentasaun no debate sira durante simeira hatudu katak TL iha duni poténsia boot rikusoin petrolífera nian iha tasi laran no mós rai-maran maibé presiza mós kontinua halo promosaun.

“Ein-termu ida ne’e ita atinje ona. Agora oinsá mak ita bele halo esforsu hodi kontinua halo atividade promosaun ba nasaun hotu ne’ebé mak sai sentru ba indústria petrolífera atu ema bele aplika”, nia dehan tan.

Notísia Relevante: Governu Halo Rezolusaun Konkursu Públiku ba Selebrasaun Kontratu Petrolíferu

Nia hatutan: “Ita sei halo promosaun iha Londres, Singapura, Austrália, Estadu Unidu Amérika (EUA) no fatin sira ne’ebé ita haree iha sentru indústria petrolífera sira ne’e, ita sei ba iha fulan-neen atu halo promosaun”.

Gualdinho rekoñese ohin loron iha mundu teknolojia presiza fasilita informasaun liuhosi meiu internet atu ema bele fásil atu asesu.

“Ita sei tau dadus no informasaun kona-ba ita-nia rejime kontratuál, fiskál no mós ita-nia poténsia sira hotu iha ANPM nia website no tau tan maneira seluk atu ita-nia dadus sira bele fásil liu atu hetan asesu husi parte interesada iha mundu tomak”, nia akresenta.

Nune’e mós, nia subliña, ANPM sei kontinua halo promosaun no anúnsia fali katak konkursu la’o ona ho hanoin ida katak tinan-oin bele iha ema ruma interese atu aplika ba bloku ne’ebé Governu lansa ona.

“Ein-termu objetivu, ha’u sente ita susesu no atinje saida mak ita hakarak duni liuhosi simeira ida-ne’e. Bainaka sira satisfáz no impresionadu ho maneira ita jere simeira ne’e no sira konsidera ida-ne’e simeira mina no gás ba dahuluk ne’ebé Timor-Leste realiza maibé ita trata sira ho dignu no profisionál to’o sira sente konfortável no seguru tanba partisipante simeira purvolta pursentu 40 foin mak mai Timor-Leste ba dahuluk”, nia haklaken.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here