Reprezentante Governu ba Setór Petrolíferu no Xefe Negosiadór ba Fronteira Marítima, Kay Rala Xanana Gusmão bainhira halo diskursu iha Konferénsia Internasionál Petróleu no Gás iha Sentru Konvensaun Dili, kinta (03/10). Imajen Tatoli/Egas Cristovão

DILI, 03 outubru 2019 (TATOLI) – Reprezentante Governu ba Setór Petrolíferu no Xefe Negosiadór ba Fronteira Marítima, Kay Rala Xanana Gusmão, hateten Planu Estratéjiku Dezenvolvimentu garante oportunidade ne’ebé rezulta husi dezenvolvimentu setór petrolíferu ba povu sira, tanba ne’e konsidera setór petrolíferu hanesan pilár fundamentál.

“Setór petróleu hanesan pilár fundamentál iha dezenvolvimentu iha nasaun ne’e, hamutuk ho turizmu, agrikultura no Planu Estratéjiku Dezenvolvimentu Timor-Leste hodi define petróliu hanesan indústria ne’ebé sei sustenta kresimentu ekonómiku, kriasaun empregu no ita-nia progresu futuru hanesan nasaun estável bem-susedidu”, Xanana tenik iha Konferénsia Internasionál Petróleu no Gás iha Sentru Konvensaun Dili (CCD-sigla portugés), kinta ne’e.

Tanba ne’e, nia konsidera katak Simeira Internasionál Petróleu no Gás ne’ebé realiza ba dahuluk iha Timor-Leste, hodi oferese oportunidade atu diskute planu, koñese partisipante setór petrolíferu, troka esperiénsia no perspetiva ho investór potensiál sira hodi bele avansa parseria ba dezenvolvimentu iha nasaun.

“Maski iha dezafíu barak ne’ebé ami hetan durante dezenvolve setór ne’e, maibé ami bele dehan ami la’o ona iha dalan naruk. Ami estabelese ona Fundu Petrolíferu atu bele asegura totál transparénsia no jestaun natoon husi ami-nia reseita petrolífera ba ami-nia jerasaun atuál no futuru”, nia akresenta.

Reprezentante Governu ba Setór Petrolíferu hatutan: “Ho orgullu, bele dehan ami hanesan nasaun datoluk iha mundu, dahuluk iha Ázia, ne’ebé asina no kumpre integralmente Índise Transparénsia husi Indústria Estrativa”.

Ho razaun ida ne’e mak Timor-Leste kria empreza petrolífera nasionál, Timor GAP atu fornese investimentu iha formasaun timoroan atu bele aproveita másimu oportunidade ne’ebé oferese husi dezenvolvimentu.

“To’o agora, ami apoia ona mestradu hamutuk ema na’in-200 resin no 2000 kursu relevante iha indústria petrolífera. Agora daudaun ami serbisu hela iha projetu Tasi Mane atu harii indústria petróleu iha Kosta Súl’, nia dehan tan.

Xanan esplika, Projetu Tasi Mane sei inklui mós ho baze fornesimentu iha Suai, refenaria iha Betano no planta Gás Naturál Liquefeitu (LNG) iha Beaço.

“Ami kria hela kondisaun nesesária atu bele esplora kampu Greater Sunrise atu bele benefísia oportunidade ne’ebé oferese husi setór petróleu no gás iha ami-nia rejiaun”, nia tenik.

Nia subliña, Timor-Leste liuhosi Timor GAP iha ona partisipasaun maioritária iha kampu gás kondensadu klase mundiál. Tanba ne’e, nia husu kolaborasaun husi parte interesante sira.

“Tanba ne’e, ami hakarak serbisu ho kolaborasaun husi parseiru setór petrolíferu atu bele garante dezenvolvimentu kampu ne’e ba tinan tuir mai”, nia dehan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here