DILI, 03 outubru 2019 (TATOLI) – Organizasaun Naun Governamentál (ONG) Lao Hamutuk, FONGTIL, no Core Group Transparency (CGT), realiza diskusaun públika sobre proposta Orsamentu Jerál Estadu (OJE) 2020.
Iha diskusaun ne’e, sosiedade sivíl envolve oradór sira hosi Parlamentu Nasionál (PN) bankada opozisaun, no Ministériu Finansa. Partisipante sira mai hosi sosiedade sivíl rasik, juventude, no estudante universitáriu sira.
Diretór Ezekutivu Forum Organizasaun Naun Governamentál Timor-Leste (FONGTIL), Daniel dos Santos, hateten soru-mutu ida ne’e ho objetivu atu fahe informasaun prelimináriu ba partisipante sira kona-ba planu OJE 2020, nune’e mós ezekusaun orsamentu 2019.
“Sosiedade sivíl iha esperansa boot ba Parlamentu Nasionál no husu atu halo diskusaun ida ho rigór no hatuur metin interese povu nian aas liu. Tanba povu presiza desizaun ida ne’ebé fó benefísiu direta ba sira tanba tinan 10 ona povu kontinua halerik ba nesesidade bázika hanesan bee-moos, mudansa klimátika ne’ebé afeta tebes, komunidade agrikultura sempre hasoru dezafiu tanba produsaun menus”, Diretór Ezekutivu FONGTIL afirma bainhira halo abertura ba diskusaun públiku ne’ebé hala’o iha salaun Katedrál ohin.
Aléinde ne’e husu mós ba PN atu halo diskusaun ho kle’an ba orsamentu sira ne’ebé aloka ba setór produtivu sira liuliu saúde, edukasaun, agrikultura, infraestrutura bázika tanba setór hirak ne’e maka iha relasaun direta ho povu.
Daniel argumenta tan, diskusaun ida ne’e atu promove debate saudavel no konstrutivu ho sosiedade sivíl no entidade hothotu liuliu Parlamentu Nasionál ho Governu bainhira halo diskusaun ba OJE tenke didi’ak no labele ataka malu de’it.
“Haree prosesu andamentu dinámika ne’ebé la’o iha ita-nia rain, apresia ba Governu tanba hahú loke espasu beibeik ba envolvimentu sosiedade sivíl. Ami hetan fatin atu hato’o ideia no diskusaun iha jornada orsamentu 2020 fulan hirak liubá no mós hetan ona dokumentu 2020 nian no orsamentu sira iha 2019”, Daniel dehan.
Daniel apresia tebes ba espasu sira ne’e tanba oferese hosi Governu ba ONG iha tempu sira ikus ne’e. Transparénsia sei ajuda prodús kualidade polítika públika ida ne’ebé aseitavel no fó satisfasaun ba sidadaun sira bele mós hakiak beibeik imajen transparénsia iha mundu nia matan.
“Ami tenke afirma katak transparénsia de’it la sufisiente más presiza liután atu fó motivasaun, promove partisipasaun no adapta situasaun oioin inklui sosiedade sivíl nia kolaborasaun polítika públika, liuliu planu Orsamentu Jerál Estadu kada tinan inklui OJE 2020 nu’udar intervensaun Estadu nian ba kria sósiu-ekonómiku nasaun nian ne’e importante tebes”, katak.
Proposta Lei OJE 2020 ne’ebé Governu liuhosi reuniaun Konsellu Ministru aprova ona mak ho totál biliaun $1,950.
Jornalista : Antónia Gusmão
Editora : Maria Auxiliadora
