Rai halai sobu Auto Estrada iha Suku Oques Postu Administrativu Maucatar no Suku Labarai Postu Administrativu Suai Vila, Munisípiu Covalima too agora seidauk hadia. Imajen/Tatoli/Eugénio Pereira

COVALIMA, 03 outubru 2019 (TATOLI)-Diretór Servisu Munisípiu Obra Publika Covalima, Alberto Cardoso dehan, atu reabilita fila fali projetu auto-estrada ne’ebé kotu iha Suku Oques Postu Administrativu Maucatar no Suku Labarai Postu Administrativu Suai Vila, Munisípiu Covalima sei hein desizaun polítika husi Ministru Obra Publika (MOP) nia kompeténsia.

Nia dehan, auto-estrada ne’e projetu boot, dezde tinan kotuk aat to´o agora seidauk hadi’a, tanba ekipa konsulta ida ba haree direta problema ne’e sei halo analiza ba problema rai ne’ebé halai depois maka foin bele hadi’a.

Diretór Servisu Munisípiu Obra Publika Covalima, Alberto Cardoso

“Estrada ne’e seidauk halo tanba konsultan ida mai haree ona rai ne’ebé monu sei halo analiza hotu maka foin hadi’a fila fali, tanba ne’e sei lori prosesu. Tanba Ministru Obra Publika rasik ko’alia kona-ba estrada ne’e agora ita hein para kompañia bele mai hadi’a fila fali,” dehan Diretór Alberto ba Ajénsia TATOLI iha nia servisu fatin MOP Covalima.

Iha fatin hanesan, Administradór Munisípiu Covalima, Afonso Nogueira Nahak husu atu MOP koordena ho kompañia internasionál bele hadi’a fila fali ona projetu estrada ne’e.

“Hanesan autoridade ita agradese governu halo ona estrada hodi fasilita dezenvolvimentu ba Covalima, agora atu hadi’a ita hein MOP maka bele haree hodi koordena ho kompañia internasionál,” tenik nia.

Antes ne’e, Prezidente Repúblika, Francisco Guterres Lú Olo vizita ba Covalima preokupa no husu ba Governu atu hadi’a hikas projetu auto estrada ne’e.
ne’ebé kotu iha Suku Oques Postu Administrativu Maucatar no Suku

Auto Estrada ne’e, VIII Governu Konstitusionál foin inaugura iha loron 17 Novembru 2018 ne’ebé liga estrada husi Munisípiu Covalima ba Fatukama Postu Adminsitrativu Zumalai ho distánsia kilómetru 30.3 ne’e gasta orsamentu tokon U$D 304 ne’ebé implementa husi Kompañia Internasionál China Overseas Engineering Company-China Railway First Group Joit Venture (COVEC-CRFG JV).

Estrada ne’e Governu halo liga dalan husi área tasi ibun sudeste ho dalan nasionál ho objetivu signifikante, hanesan dezenvolvimentu infraestrutura petroliu, aselera dezenvolvimentu hodi prepara ba futuru kriasaun plantasaun Plataforma Suai Supplay Base (SSB) liga ba Refinaria Betanu, no LNG Beacu-Viqueque inklui fasilita distribuisaun lojístika no produtu agríkola no indústria ba merkadu lokál no internasionál.

Jornalista: Eugénio Pereira

Editór      : Rafy Belo

HAKEREK NO HATÁN

Please enter your comment!
Please enter your name here