Diretora Nasionál Administrasaun no Finansa SEJD, Maria Luisa Monteiro. Imajen/Hortençio Sanchez

DILI, 03 outubru 2019 (TATOLI) – Diretora Nasionál Administrasaun no Finansa Sekretaria Estadu Juventude no Desportu (SEJD), Maria Luisa Monteiro, hateten prosesu reabilitasaun Jináziu Dili no Voli Praia daudauk ne’e tama ona iha faze verifikasaun.

Tuir Diretora ne’e, proposta tékniku iha 4 outubru no sei kontinua ho prosesu loke envelope finanseiru tuir prosesu lisitasaun dokumentus ne’ebé prevee ona.

“Iha verifikasaun proposta tékniku ne’e iha kompañia hitu mak kompete ba konstrusaun Jináziu Dili maibé kompañia neen de’it mak tama tamba kompañia ida iha failansu ba prosesu tuir mai tamba la prienxe avaliasaun prelimináriu ne’ebé nakloke ba konkorente hotu iha  25 outubru 2019”, tenik Maria Luisa ba Agência Tatoli iha edifísiu SEJD, Lecidere, kinta ne’e.

Nune’e mós kona-ba voli praia nian, iha kompanñia lima mak kompete maibé ida de’it mak la avansa tamba la prienxe prosedimentu konkursu.

Nia subliña, faze verifikasaun proposta ramata ona no kompañia ne’ebé nia valór tékniku boot liu na’in-rua maka avansa tuir matadalan iha dokumentu lisitasaun.

“Agora daudaun prosesu finalizasaun ba prosesu avaliasaun dokumentu kompañia sira-nian. Entaun projetu rua ne’e hotu kompañia nasionál ne’ebé nia domisializasaun iha Timor-Leste maka bele tuir”, nia akresenta.

Totál orsamentu ba projetu reabilitasaun Jináziu Dili no Voli Praia hamutuk $539,255 no tipu orsamentu tama iha kategoria kapitál dezemvolvimentu, hafoin ramata mak bele fó sai parte rua nia montante ba kada projetu.

Projetu rua ne’e hala’o hodi prepara jogu komunidade ho lian portugués (CPLP-sigla Portugés), ne’ebé Timor-Leste sei sai hanesan uma-nain iha 2020.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here