Primeiru-Ministru, Taur Matan Ruak. Imajen/Tatoli.

DILI, 03 outubru 2019 (TATOLI) – Iha edisaun dahuluk Konferénsia Internasionál kona-ba Petróleu no Gás Timor-Leste, Primeiru-Ministru (PM), Taur Matan Ruak, garante ba investór sira katak iha atividade esplorasaun sira sei kontinua sein obstáklu, mesmu iha periúdu tranzisaun.

“Ba sira ne’ebé mak investe tiha ona iha esplorasaun no produsaun husi ita-nia rekursu petrolíferu sira offshore, ha’u hakarak garante katak imi-nia atividade sira bele no sei kontinua sein obstákulu, iha períodu hafoin tranzisaun husi Área Konjunta Dezenvolvimentu Petrolíferu (JPDA-sigla inglés) ba jurizdisaun eskluziva Timor-Leste nian”, diskursu PM Taur iha Konferénsia Internasionál Petróleu no Gás iha Sentru Konvensaun Dili (CCD-sigla portugués), kinta ne’e.

Biban ne’e, ba partisipante sira, Xefe Governu mós haktuir Governu dadaun ne’e aprova ona pakote lejizlativu ida atu garante tranzisaun ne’ebé kaman no efisiente, hodi respeita no proteje investór sira nia direitu no espetativa lejítima tomak.

“Iha biban hanesan, Governu hala’o hela reforma lejizlativa ida ne’ebé séria no abranjente, ho objetivu atu moderniza kuadru jurídiku ne’ebé eziste ona no aliña nia ho sistema jurídiku sira ne’ebé avansadu liu iha mundu, ne’ebé importante tebes ba konstrusaun sistema jurídiku ida ne’ebé maka maduru, bazeia ba Estadu Direitu nian, no esensiál atu kria konfiansa no fó estabilidade no seguransa jurídika ba investimentu estranjeiru sira”, nia dehan tan.

Maski nune’e PM rekoñese Konstituisaun obriga Estadu atu uza rekursus naturál hodi garante repartisaun ne’ebé justa no ekuitativa husi rekursu sira-ne’e bazeia ba supremu interese nasionál.

“Ita boot sira ne’e mak ema profisionál, matenek na’in no espesialista sira ne’ebé iha esperiénsia no hatene didi’ak kona-ba kna’ar importante ne’ebé maka petróleu dezempeña nafatin iha dezenvolvimentu no moris-di’ak ba ami nia país foun ne’e. Timor-Leste hetan duni grasa boot ho rezerva petróleu ne’ebé signifikativa, no parte importante ida husi rezerva ne’e seidauk esplora”, nia akresenta.

Nia hatutan: “Governu ne’e kompromete-án tomak atu asegura katak ami nia bensa ne’e sai nu’udar fonte oportunidade no sei la nakfilak ba maldisaun”.

PM Taur konsidera susesu iha kumprimentu mandatu konstitusionál ezije katak Governu servisu hamutuk no besik liu ho investidór sira hodi dada empreza foun, inisiativa no parseria sira  dezenvolvimentu nian.

Xefe Governu konsidera Konferénsia Internasionál ne’e hanesan eventu importante ba Timor-Leste atu bele sai destinu negósiu ba nasaun viziñu sira. 

“Eventu ne’e reprezenta marku importante ida iha jornada Timor-Leste nian atu bele sai nu’udar destinu preferensiál ba negósiu sira no investimentu iha Sudeste Aziátiku, iha área esplorasaun no produsaun petróleu no gás nian”, nia tenik.

Nune’e, Xefe Governu espera ho númeru partisipante ne’ebé barak bele sai prova ida katak Timor-Leste sai nu’udar destinu preferensiál ba negósiu sira no investimentu.

Konferénsia Internasionál partisipa husi oradór nasionál no internasionál hamutuk na’in-30 no partisipante husi nasaun 16 no partisipante hamutuk 250 no empreza hamutuk 250.

“Ami fiar katak hahú ohin ba tinan balu tan, ema hotu sei hanoin katak loron ida-ne’e nu’udar loron ida ba determinasaun no responsabilidade ne’ebé deside tiha ona dalan sira ba Timor-Leste hodi alkansa ninia rekoñesimentu ne’ebé maka nia merese duni hanesan atór importante ida iha indústria internasionál petróleu no gás nian”, subliña PM.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here