Estrutura Organizasaun Globál Prevensaun Mudansa Klimátika (OGMK), hala'o enkontru ho Prezidente Repúblika, Francisco Guterres Lú Olo. Imajen Mídia PR

DILI, 3 outubru 2019 (TATOLI)–Organizasaun Globál Prevensaun Mudansa Klimátika (OGPMK) sei implementa tara-bandu atu bele fó sansaun ba sidadaun ne’ebé estraga ai-horis iha rai laran, liliu iha Dili laran.

Ohin, iha Palásiu Prezidente Nicolau Lobato, Bairru Pité, estrutura organizasaun ne’e hasoru malu ho Prezidente Repúblika (PR), Francisco Guterres Lú Olo, hodi informa kona-ba inisiativa ne’e tanba tuir sira-nia haree katak mudansa klimátika ne’e mós mosu tanba hahalok ema nian ne’ebé tesi ai arbiru.

Vise Diretór Asosiasaun Globál ba Prevensaun Mudansa Klimátika, Francisco da Costa Fernandes, hateten mudansa klimátika sai preokupasaun ema hotu nian, inklui Prezidente Repúblika (PR) rasik no mós nai-ulun sira iha nasaun ne’e no mundu, ne’ebé fó presaun ba ema-nia moris.

Nia dehan, organizasaun ne’e haree katak situasaun ida-ne’e lori ameasa boot ba ema-nia vida. Tanba ne’e mak organizasaun ne’e hakarak atu bolu ema hotu nia kontribuisaun atu luta hasoru situasaun refere.

Francisco husu sidadaun hotu tenke halo tuir programa Xefe Estadu katak ‘Sidadaun ida, ai-oan ida’.

Organizasaun ne’e konsidera programa PR nian importante atu sidadaun ida kuda ai-oan ida nune’e bele hamatak fila fali foho sira.

Organizasaun ne’e mós preokupa tanba oras ne’e daudaun, bee-matan sira maran hotu, halo rai maran, bailoron naruk, ai laiha, halo eskola oan sira bainhira tempu rekreiu labele hetan anin fresku iha aihún tanba aihún ida mós laiha.

Ne’e duni, organizasaun ne’e hola inisiativa hodi apela ba ema hotu liliu Governu atu serbisu hamutuk ho parte hotu, sosiedade sivíl no komunidade en-jerál, atu serbisu hamutuk hodi tau-matan ba asuntu sériu ne’e.

Francisco hateten organizasaun ne’e iha prinsípiu ida oinsá mak atu halo konsolidasaun ba populasaun hotu atu asegura ai sira ne’ebé mak iha ona.

Atu buat sira ne’e bele realiza,  nia tenik, mak organizasaun ne’e propoin ona ba Xefe Estadu kona-ba meiu ida ne’ebé bele aplika mak tara-bandu.

“Tenke aplika tara-bandu tanba sei iha ema barak ne’ebé mak seidauk iha konsiénsia di’ak hodi kuidadu ai-oan. Bainhira ema ruma ne’ebé hanoin di’ak atu kuda ai-oan, maibé balun ba estraga tiha nune’e tinan ba tinan rai ne’e molik no maran nafatin”, hateten Francisco, hafoin enkontru ho Xefe Estadu.

Organizassun ne’e halo ona peskiza iha fatin barak kona-ba ema ne’ebé estraga ai-horis, nune’e organizasaun ne’e konsulta mós ho autoridade lokál sira iha Dili ne’ebé fó mós apoiu atu aplika tara-bandu oinsá kriminaliza ema ne’ebé estraga ai-horis.

Aleinde tara bandu, organizasaun ne’e mós hanoin ona atu oinsá fó formasaun ba sidadaun sira, konsensializa sira atu tau-matan ba ai-horis ne’ebé iha ona no hanoin atu kuda barak liután.

Relasiona ho inisiativa ne’e, Xefe Estadu, Francisco Guterres Lú Olo husu atu Asosiasaun Globál ba Prevensaun Mudansa Klimátika bele habelar liután kampaña nasionál “Sidadaun ida, ai-oan ida” ne’ebé Prezidente Repúblika hahú tiha ona iha tinan ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here