Ilustrasaun

DILI, 03 outubru 2019 (TATOLI)– Diretór Ospitál Nasionál Guido Valadares (HNGV), Aniceto Barreto informa katak HNGV simu inan-isin rua ida ho idade 30 hodi halo tratamentu iha HNGV, la konsege salva nia vida no hakotu iis tanba tensaun maka´as inan isin-rua ne´e nian hodi prejudika oan fatin nakfera.

“Pasiente ho kondisaun la konsente normál signifika pasiente halerik tun, halerik sae hakilar to’o isin kamutis no kabun kidun moras, la hanesan ema sira ne’ebé partus normál, depois mai iha ne’e (HNGV) médiku, parteira sira halo evalusaun to´o 30 ka 40 minutu iha indikasaun katak oan fatin mak nakfera tanba tama iha maternidade tensaun maka´as halo kabun mamar, kamutis no indikasaun katak iha oan fatin nakfera,” informa Diretór Aniceto Barreto ba jornalista Sira bainhira halo konferénsia imprensa iha HNGV, ohin.

“Imediatamente anistésia sira lori ba sala operasaun depois sira loke saida mak sira hetan entaun sira hetan mais ou menus raan litru rua iha ita-nia parte kabun entaun hanoin took raan ne’ebé iha ita- nia isin la to´o litru rua entaun raan barak sai ona mai li´ur,”  hatutan tan Diretór HNGV ne´e.

Ezekutivu ne´e reforsa tan katak médiku sira mós hetan nakfera iha operasaun fatin ne´ebe uluk inan isin-rua ne´e opera iha tinan 2012, iha 6 cm nakfera, entaun bebé nia ulun sai ona mai li´ur la´ós ona iha oan fatin entaun bebé la moris ona no HNGV la konsege salva ona bebé ne’e.

“Entaun doutór sira hasai tiha bebé, suku fila fali nakfera ne’e depois tuku 5 lokraik operasaun hotu muda ba iha kuartu ida, sira bolu fatin rekoperasaun depois operasaun la to´o 30 minutos derepente pasiente hetan atakasaun liman ain malirin,” nia haktuir.

Médiku timoroan  ne´e esplika, kauza la konsege salva inan isin-rua ne´e iha posibilidade rua de´it. Primeiru, kuandu nakfera iha oan fatin, bee foer iha oan fatin bele halai tama fali ba ita-nia sistema sirkulasaun raan bele halo intupidu iha korasaun, bele halo intupidu iha fatin ka órgaun barak iha ita-nia isin loloon.

Ida ne’e mak akontese tanba pasiente raan fakar ona prezisa tau raan presiza trasfere raan loloos labele mate tanba raan maibé sira husi diresaun opstetikolojia halo audio kona-ba mate, sira halo aprezentasaun kompletu iha sistema indikasaun sira bolu inbolismu no sistema sirkulasaun afeta kurasaun no bele korasaun para derepente.

Embolismu bele akontese iha sistema pulmaun halo dada iis para derpente, ida ne’e mak akontese ba inan ne’e ita sente triste tanba ita lakonsege salva ho kondisaun inan ne’ebé mai HNGV tanba mai ho tensaun ne’ebé ita labele deteta tanba durante halo operasaun kondisaun jerál ladi´ak.

Maibé intervensaun médiku tenke halo no risku tenke foti maibe dehan fali médiku malprátika hatudu took dehan malpratika. Se ema ida dehan malpratika tenke hatne definisaun malprátika no komunidade ida la bele dehan malprátika bainhira sira la hatane’e kondisaun ka indikadór la´ós tuur de´it ema mate ona dehan de´it malprátika.

“Ita hotu triste ba inan feton ne’e maibe labele salva tanba ami-nia esforsu mak ne’e ona,” dehan Diretór Aniceto Barreto.

Entretantu, tuir kronolojia informa husi  Diretór Aniceto Barreto katak inan isin rua ida ho idade 30 labele salva nia vida isin rua ba dala neen. Isin rua primeiru partu normál, segundu partu normál, terseiru partu abortu, kuartu partu abortu, kintu halo operasaun no sestu labele salva ona vida.

Pasiente ne´e transfere husi Sentru Saúde Becora ba iha HNGV no to´o mai iha Banku urjénsia iha tuku 4 lorokraik. Transfere husi Sentru Saude Becora ho indikasaun prolongada atu prosesu partu.

“Pasiente ne’e mai iha loron 20 setembru no prosessu prolongada. Partu ne’e loloos sira ne’ebé mak partus ona labele liu seis oras kuandu sintoma atu partus ona kabun kidun moras atu partu labele liu seis ka oito oras entaun ida ne’e liu ona 14 oras seidauk partus, entaun Sentru Saúde Becora transfere mai iha HNGV,” haktuir Diretór Aniceto Barreto ba jornalista sira .

Jornalista :Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here