Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo. Foto/Natalino Costa.

DILI, 03 outubru 2019 (TATOLI) – Diretór Jerál Administrasaun Finansa Ministériu Transporte no Komunikasaun (MTK), Deonísio de Araújo, hateten MTK deside ona hodi prevee osan millaun $1, atu hola biskota hodi hala’o operasaun iha Dili laran.

“Planu tinan oin, Ministériu Transporte no Komunikasaun nian maka atu hola biskota tanba foin daudaun ami konsege propoin osan ho montante boot, maibé husi Komisaun Revizaun Orsamentu Polítika liuhosi diskusaun aprova de’it millaun $1”, dehan nia ba Tatoli iha nia kna’ar fatin, Kaikoli, ohin.

Nia salienta, hola bis nu’udar planu Ministériu Transporte no Komunikasaun nian ho objetivu atu antesipa ba greve mikrolete sira.

“Ita sempre haree mikrolete sira greve hodi difikulta ita-nia estudante sira no komunidade nia atividade husi fatin ida bá fatin seluk tanba ne’e kuandu mosu greve, ita iha ona transporte alternativa atubele korresponde ho imediatu”, dehan.

Orsamentu akizisaun ba bus mai husi orsamentu ministériu nian, hosi totál orsamentu ne’ebé millaun $5-resin aprova husi Komité Revizaun Orsamentu Polítika iha diskusaun foin lais.

“Orsamentu ba akizisaun ne’e mai husi osan adisionál millaun $5 husi ministériu nian ba kategoria kapitál dezenvolvimentu”, konklui.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here