Primeiru-Ministru, Taur Matan Ruak (Klaran) Akompaña husi Xefi Negosiador Fronteira Maritima no Terestre, Xanana Gusmao (karuk) no eis Presidenti RDTL, Ramos Horta (loos) Ministru Estadu Prezidénsia Konsellu Ministrus, Hermenegildo Augusto Cabral (loos) Lansamentu Partisipa Iha Simeira Internasionál Mina no Gas. iha Sentru Konvensaun Dili (CCD). Kinta,(03/10/2019). Imajen/Tatoli.

DILI, 03 Outubru 2019 (TATOLI)—Laureadu Prémiu Nobel da Paz, José Ramos Horta, hateten polítika kona-ba rikeza Mina no Gás ne’e hanesan sekuénsia lójika liuhusi informasaun sira ne’ebé nia hetan, nia pesoalmente komprende no konklui katak polítika ne’ebé Kayrala Xanana Gusmão tau ne’e maka loos duni.

“Ha’u haree buat ne’e hanesan sékuensia lójiku ida maka mai kle´ur ona. Ha’u la hola parte iha Governu maibé kualker lidér, iha Governu ka lae, ha’u buka atu hetan informasaun pesoál hodi komprende politíka enerjétika rejiaun iha mundu. Tanba buat ne’e dinámiku no muda, nune’e ho informasaun sira ne’ebé ha’u hetan tinan ida-nia laran, ha’u rasik konklui katak politika ne’ebé Kay Xanana Gusmão halo ne’e maka loos duni,” dehan José Ramos Horta iha Siméria Internasionál Daruak Kona-ba Petróleu no Gás Timor-Leste nian iha Centro Covencão Dili (CCD), Merkadu Lama, Dili, kinta (03/10/2010).

Eis Prezidente Repúblika ne’e hatutan, rikeza boot Timor-Leste nian maka Mina no Gás ne’ebé bele uza hodi dezenvolve Timor-Leste ho di’ak liu. Rikeza ne’e, nia dehan, ho nia reseita mak bele fó osan ba estadu atu bele halo inisiativa projetu infraestrutura boot no kualker ekonomia modernu atu la’o ba oin tenke iha infraestrutura.

Iha ne’e mak, nia hatutan, polítika Governu nian ne’ebé mai kedas husi Planu Estratéjiku Dezenvolvimentu Nasional (PEDN) ne’ebé dudu Governu Timor-Leste hodi esforsu-aan atu dezenvolve setór enerjia ba dezenvolvimentu nasionál.

“Polítika ne’e klaru. Primeiru, ita hetan tiha ona fronteira marítima liña mediana no akordu kona-ba Greater Sunrise tasi mane. Governu halo esforsu kle´ur ona buka parseiru dezenvolvimentu iha setór enerjia atu nune’e bele tane ita-nia dezenvolvimentu nasionál,” Horta hateten.

Timor-Leste, nia haklaken, iha mapa mundu nian Timor-Leste iha gás no petróleo ne’ebé iha área ida seguru liu kompara ho South China Sea no fatin seluk ne’ebé hetan problema barak. Maske Timor-Leste viziñu ho Austrália ho Indonézia ne’ebé besik merkadu enerjia nian no merkadu bo’ot maka Xina, Korea no Japaun maibé buat hotu garantidu hodi bele dada investidór sira bele investe iha Timor-Leste.

“Ita haree mós ba governasaun, iha tinan besik 20 nia laran hatudu ona ba investedór sira ita nunka iha problema ho investidór sira. Nunka iha loja ruma afetadu maske iha tinan 2006 ita iha problema ka krize polítika ida. Iróniku iha mundu atúal ne’e, iha Sudueste Aziatiku, Timor-Leste mak seguru liu tanba ita rasik nunka sai ameasa ba ema ida no nunka iha ameasa esternu kontra ita. Tanba ne’e maka ha’u halo analiza ida investidór sira interesadu tebes ho ita,” nia esplika.

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here