Parade ofisiaís F-FDTL. Imajen/TATOLI

DILI, 03 outubru 2019 (TATOLI)-Ministru Defeza no Ministru Interiór Interinu, Filomeno Paixão de Jesus, husu ba membru FALÍNTIL-Forsa Defeza Timor-Leste (F-FDTL) atu banati tuir mahein São Miguel Arcanjo, hodi sai protetór ba nia sarani no nia emar sira.

“Ita hotu tenke tuir ezemplu ita nia padrueiru militár nian ne’ebé mak fó seguransa ba reinu Lalehan nian nune’e mós ita nia militár sira fó seguransa ba ita nia povu,” apela Filomeno Paixão de Jesus, hafoin partisipa iha misa solene ba mahein F-FDTL nian, Santo Miguel Arcanjo, ohin, iha Kuartél Jenerál F-FDTL, Fatuhada, Dili.

Misa solene ne’e prezide husi Arsebispu Metropolitanu Dili, Dioseze Dili, Mgr. Virgílio do Carmo da Silva, SDB, ne’ebé iha nia omilia  husu ba membru F-FDTL atu kontinua agradese ba Maromak liuhusi protesaun São Miguel bele fó nafatin kbiit no forsa protesaun ba instituisaun.

“Atu komemora loron mahein instituisaun F-FDTL nian, konvida ema hotu atu Agradese ba di’ak ne’ebé mak Maromak haraik mai ita liuhusi mahein Miguel Arcanjo ho nia kolega sira,” tenik Bispu Virgílio do Carmo da Silva, SDB.

F-FDTL  eskoilla São Miguel Arcanjo ba mahein instituisaun,  nune’e, kada tinan iha loron 29 setembru,   instituisaun forsa defeza ne’e   selebra loron padrueiru  ho misa agradesimentu.

Misa solene ba mahein São Miguel partisipa  mós husi  Xefe Estadu Maiór  FALINTIL-Forsa Defeza Timor Leste (F-FDTL), Majór Jenerál Lere Anan Timur, membru F-FDTL, Diretór no Xefe Departamentu Ministériu Defeza no konvidadu seluk tan.

Jornalista : Osório Marques

Editór       : Francisco Simões

HAKEREK NO HATÁN

Please enter your comment!
Please enter your name here