Primeiru-Ministru, Taur Matan Ruak. Imajen/TATOLI

Exelénsia sira,

Maun Boot Kay Rala Xanana Gusmão,

 Dr. José Ramos Horta,

Membru sira Governu Konstitusionál da-VIII

Ilustre Prezidente Bankada Parlamentár nian sira (CNRT, Fretilin, PLP, PD, Khunto, Frente Mudança-UDT, no PUDD)

I lustre Deputada no Deputadu sira Parlamentu Nasionál nian

Embaixadór no Diplomata sira,

I lustre delegadu, konvidadu no partisipante sira, Senhor no Senhora sira

Sai onra no priviléjiu boot ida mai ha’u bele prezide serimónia inaugurasaun ba edisaun dahuluk hosi Simeira kona-ba Petróleu no Gás Timor-Leste nian, ne’ebé organiza hosi Autoridade Nasionál Petróleu no Minerais (ANPM), ne’ebé mak ha’u agradese tebetebes ba imi-nia Amável konvite.

Eventu ne’e reprezenta marku importante ida iha jornada Timor-Leste nian atu bele sai nu’udar destinu preferensiál ba negósiu sira no investimentu iha Sudeste Aziátiku, iha área sira esplorasaun no produsaun petróleu no gás nian, no númeru partisipante ne’ebé barak tebetebes maka sai hanesan prova ida katak Timor-Leste sai nu’udar destinu preferensiál ba negósiu sira no investimentu.

Ami fiar katak, hahú ohin ba tinan balu tan, ema hotu sei hanoin katak loron ida-ne’e nu’udar loron ida ba determinasaun no responsabilidade, ne’ebé deside tiha ona dalan sira ba Timor-Leste hodi alkansa ninia rekoñesimentu ne’ebé maka nia merese duni, hanesan atór importante ida iha indústria internasionál petróleu no gás nian.

Simeira Dahuluk ida ne’e kona-ba Petróleu no Gás Timor-Leste nian akontese daudaun iha momentu ida krusiál ba ita-nia rain ninia dezenvolvimentu, progresu no modernidade.

Ita konsege to’o akordu ida ho ita-nia país viziñu, Commonwealth Austrália nian, kona-ba estabelesimentu fronteira marítima ida-ne’ebé permanente entre nasaun rua, nune’e taka ona kapítulu ida ne’ebé importante tebetebes ba ita-nia istória, ne’ebé dura tempu barak nia laran.

Esforsu estraordináriu ne’ebé hala’o ona husi país rua ne’e hodi alkansa Tratadu Fronteira Marítima foun no aseitasaun jerál Tratadu ne’e nian hatudu katak nasaun sira bele hakat liu difikuldade polítika atu buka interese di’ak liután ba sira-nia povu.

Ita agora hahú tempu foun ida iha relasaun entre Timor-Leste no Commonwealth Austrália nian, ne’ebé promete no iha potensiál atu kria futuru di’ak liu ba moris-di’ak sidadaun sira-nian no atu diversifika ekonomia Timor-Leste nian.

Projetu Greater Sunrise, ne’ebé iha potensiál boot, ita hakarak arranka iha inísiu tinan 2020 no sei husik paralizasaun ne’ebé maka dura tempu naruk.

Ba sira ne’ebé mak investe tiha ona iha esplorasaun no produsaun husi ita-nia rekursu petrolíferu sira offshore, ha’u hakarak garante katak imi-nia atividade sira bele no sei kontinua sein obstákulu, iha períodu hafoin tranzisaun husi Área Konjunta Dezenvolvimentu Petrolíferu antiga (ne’ebé koñese ho sigla JPDA-sigla, iha lian inglés) ba jurizdisaun eskluziva Timor-Leste nian.

Loos duni, Governu daudaun ne’e aprova ona pakote lejizlativu ida atu garante tranzisaun ida-ne’ebé kaman no efisiente, hodi respeita no proteje imi-nia direitu no espetativa lejítima tomak.

Iha biban hanesan, Governu hala’o hela reforma lejizlativa ida ne’ebé séria no abranjente, ho objetivu atu moderniza kuadru jurídiku ne’ebé eziste ona no liña nia ho sistema jurídiku sira ne’ebé avansadu liu iha mundu, ne’ebé importante tebes ba konstrusaun sistema jurídiku ida ne’ebé maka maduru, bazeia ba Estadu Direitu nian, no esensiál atu kria konfiansa no fó estabilidade no seguransa jurídika ba investimentu estranjeiru sira.

Ida-ne’e hanesan mós momentu ida-ne’ebé loos duni atu fó hakat ida ba oin.

Ita-nia Konstituisaun obriga Estadu atu uza rekursus naturaís, hodi garante repartisaun ida-ne’ebé justa no ekuitativa husi rekursu sira-ne’e, bazeia ba supremu interese nasionál.

Ita boot sira ne’e mak ema profisionál, matenek na’in no espesialista sira ne’ebé iha esperiénsia no hatene didi’ak kona-ba kna’ar importante ne’ebé maka petróleu dezempeña nafatin iha dezenvolvimentu no moris-di’ak ba ami nia país foun ne’e.

Timor-Leste hetan duni grasa boot ho rezerva petróleu ne’ebé signifikativa, no parte importante ida husi rezerva ne’e seidauk esplora.

Governu ne’e kompromete-án tomak atu asegura katak ami nia bensa ne’e sai nu’udar fonte oportunidade no sei la nakfilak ba maldisaun.

Maske nune’e, susesu iha kumprimentu mandatu konstitusionál ezije katak Governu servisu hamutuk no besik liu ho investidór sira, hodi dada empreza foun, inisiativa no parseria sira  dezenvolvimentu nian.

Kooperasaun durante tempu naruk entre Timor-Leste no empreza internasionál sira hanesan ConocoPhillips no nia Asosiada sira iha operasaun petrolífera iha kampu produsaun Bayu Undan nian, daudaun ne’e, no iha kampu EKKN (Elang-Kakatua-Kakatua North) iha tempu liubá, ho Eni SpA no nia Asosiada sira iha operasaun petrolífera iha kampu Kitan, no ho Woodside Energy no nia Asosiada sira daudaun ne’e, no mós ho empreza sira esplorasaun nian iha tempu liubá no daudaun ne’e, estabelese ona baze ida-ne’ebé di’ak ba dezenvolvimentu indústria petrolífera iha Timor-Leste. Parseria sira ne’e estabelese ona dalan di’ak ida ba sira ne’ebé foin tama iha área ne’e, no daudaun ne’e hala’o hela operasaun esplorasaun sira hanesan Timor Resources, Carnarvon, nune’e mós ita-nia Empreza Nasionál Petróleu nian.

Ho konsiderasaun ba ne’e, Governu – liuhusi Dekretu Regulamentár ida no Orden ida hosi Sua Exelénsia Ministru Petróleu – aprova ona alokasaun bloku foun sanulu-resin-ualu ba atividade petrolífera sira. Husi bloku hirak-ne’e, hitu lokaliza iha rai (onshore) no sanulu-resin-ida lokaliza iha tasi (offshore) iha Timor-Leste nia zona eskluziva.

Iha tempu badak sei lansa no kondús prosedimentu sira lisitasaun públika nian hosi ita-nia Autoridade Nasionál Petróleu no Minerais (ANPM), nu’udar reguladóra ba setór petróleu nian.

Ida ne’e maka ronda lisensiamentu sira ne’ebé ita hotu hein durante tempu naruk, hafoin liu tiha dékada ida, bainhira Timor-Leste hala’o ba dahuluk ninia ronda lisensiamentu iha tinan 2005/2006, tanba ne’e ha’u konvida imi-hotu atu partisipa no mai hamutuk ho Timor-Leste iha konstrusaun futuru ida ne’ebé di’ak liu ba nia povu.

Ha’u hein katak durante eventu loron rua nian ne’e, partisipante no delegadu sira hotu bele uza  tempu ne’e ho di’ak hodi aumenta rede kontaktu sira ne’ebé di’ak liután ba parseria komersiál sira iha futuru.

Ha’u laiha dúvida katak ami nia país, ne’ebé nakonu ho enerjia, bele sai interese maka’as ba Ita-Boot sira no ba ita-Boot sira-nia empreza, no katak, ita hamutuk, bele kontinua hametin Timor-Leste nia dalan ba inovasaun no prosperidade.

Ha’u hakotu ha’u nia diskursu ho agradesimentu ba membru sira komisaun organizadora ne’ebé lidera hosi Autoridade Nasionál Petróleu no Minerais (ANPM) no IN-VR (INVIAR), hein katak konferénsia dahuluk ida ne’e, no ba sira seluk ne’ebé sei tuirmai, lori proveitu no satisfasaun ba ita tomak.

Obrigadu Barak!

Nai Maromak haraik bensa mai ita-hotu!

HAKEREK NO HATÁN

Please enter your comment!
Please enter your name here