Amostra fatuk ne’ebé China Harbour atu lori bá teste. Foto/Espesiál.

DILI, 03 setembru 2019 (TATOLI) – Vise-Prezidente Autoridade Nasionál Petróleu no Minerál (ANPM) ba asuntu Esplorasaun Minerál, José Gonçalves, informa ANPM hala’o ona investigasaun ba kazu ka insidente ne’ebé akontese ba kompañia China Harbour atu lori amostra fatuk bá teste iha laboratóriu.

“Ami halo ona investigasaun ba kazu ne’e, ami deskobre katak iha fallansu iha administrasaun ne’ebé kompañia China Harbour nia laran bainhira bá halo checking iha aeroportu tanba sira la aneksa autorizasaun ne’ebé ami fó ba sira, tanba ne’e bele lori amostra ne’e bá teste ona”, Vise-Prezidente ANPM ba Ajénsia Tatoli, iha Sentru Konvensaun Dili, ohin.

José Gonçalves friza ANPM hakarak klarifika de’it ba insidente ne’ebé akontese ba empreza China Harbour atu haruka amostra fatuk bá teste iha laboratóriu, maibé la konsege lori sai tanba Kuarentena lahetan pedidu husi ANPM.

“Ami prosesa no fó duni autorizasaun no karta rekomendasaun ba ita-nia Autoridade Alfándega no Kuarentena iha aeroportu atu fó sai amostra ne’e, maibé kompañia la aneksa bainhira checking iha aeroportu”, katak.

Iha inísiu jullu, nia dehan China Harbour hatama duni pedidu mai Institutu Nasionál no Jeolojia no haruka ona mai ANPM atu prosesa no fó ona autorizasaun kompleta ho karta rekomendasaun.

Amostra fatuk ho kilograma 65 ne’e, China Harbour foti iha área Kaitehu, Likisá hafoin halo rebentamentu atu lori amostra bá teste iha Xina hodi haree kualidade fatuk ne’e atubele uza ba aterra konstrusaun portu Tibar.

“Ami koordena ona ho autoridade kompetente sira (Alfándega no Kuarentena) atu fó autoriza ona hodi lori amostra fatuk ne’e bá teste”, konklui.

Antes ne’e, Diretór Nasionál Kuarentena no Bioseguransa, Venâncio Oliveira, informa katak hein pedidu husi ANPM atubele lori fatuk ne’e bá teste.

Tanba iha kuarta (26/09), empreza China Harbour lori fatuk ho kilograma 65 liuhosi Aeroportu Nicolau Lobato, atu halo teste laboratóriu, maibé ANPM seidauk fó koñesimentu ba Diresaun Nasionál Kuarentena.

Tanba ne’e hein pedidu husi ANPM atu prosesa lisensiamentu ba kompañia China Harbour nune’e lori amostra ne’e bá hala’o teste iha rai-li’ur no bainhira kompañia prienxe rekizitu, Kuarentena tau adezivu (stiker) no segel, atu asegura fatuk ne’e labele hetan apreensaun (foti).

Bazeia ba dekretu lei 21/ 2003 no dekretu Governu númeru 1/2006 ne’e, sasán saida de’it mak atu esporta no importa Kuarentena fó lisensiamentu no tau adezivu no segel atu asegura.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here