Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 03 outubru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, informa funsionáriu na’in-lima sei bá halo estájiu profisionál iha Autoridade Nacional de Comunicações (ANACOM) Portugál durante fulan ida.

“Ha’u komunika ona ho Prezidente Autoridade Nacional de Cominições (ANACOM) Portugál, ami sei haruka funsionáriu sira arranka iha loron 14 outubru”, dehan João Freitas ba Ajénsia Tatoli iha nia knaar fatin, ohin.

Funsionáriu sira ne’e sei bá ho grupu rua, na’in-rua hosi enjeñeiru tékniku sei arranka iha 14 outubru no sei fila iha 9 novembru, enkuantu na’in-tolu seluk sei bá iha 11 novembru to’o 8 dezembru. Na’in-tolu ne’e, rua maka enjeñeiru no ida ekonomista.

Nune’e, sira na’in-lima sei serbisu iha área espesialidade ida-idak nian, balun iha área rádiu no televizaun, área estasaun no funsionáriu ida haree oinsá atu asegura kualidade serbisu hosi telemovel no ida seluk sei haree interferénsia rede komunikasaun nian liuhosi ema nia telemovel.

“Funsionáriu sira ne’e sei ba ANACOM Portugál hodi halo estájiu profisionál tuir idak-idak nia área espesífika”, katak.

Maski funsionáriu sira halo estájiu profisionál ho durasaun fulan ida de’it, maibé bá oin ANC iha ona planu atu haruka funsionáriu sira bá estuda tan área espesífika téknika nian ba tinan ida ka tolu.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here