iklan

EKONOMIA, HEADLINE

Alokasaun OJE 2020 Tuir PED

Alokasaun OJE 2020 Tuir PED

Diskusaun públiku OJE 2020. Foto/Antónia Gusmão.

DILI,  03 outubru 2019 (TATOLI) – Diretór Polítika Ekonomia Finansa Ministériu Finansa (MF), Epifânio Alarico Martins, hateten alokasaun orsamentu iha OJE 2020 ne’e tuir setór sira ne’ebé hatuur iha Planu Estratéjiku Dezenvolvimentu (PED).  

Epifânio Alarico Martins informa asuntu ne’e bainhira reprezenta MF iha diskusaun públiku ba Orsamentu Jerál Estadu (OJE) 2020 ne’ebé hala’o hosi Organizasaun Naun Governamentál (ONG) Lao Hamutuk, FONGTIL, no Core Group Transparency (CGT) iha salaun Katedrál, ohin.

Iha aprezentasaun, Diretór Polítika Ekonomia Finansa Martins dehan fonte OJE ba 2020 nian tuir projesaun ne’ebé Governu halo iha millaun $210 ne’ebé koleta hosi reseita doméstika no transferénsia hosi fundu petrolíferu millaun $1.4 no Rendimentu Sustentavel Estimadu (RSE) hamutuk millaun $537. Exesu levantamentu Rendimentu Sustentavel Estimadu (E.RSE) hamutuk millaun $929, empréstimu ne’ebé finansia mós iha OJE 2020 maka millaun $73 no utiliza saldu tezouru hamutuk millaun $200, no totál hamutuk biliaun $1,950.

“Alvu atu atinje iha longu prazu maka tuir vizaun Timor-Leste sai nasaun ho rendimentu médiu no altu iha populasaun ne’ebé edukadu no saudavel, faze primeiru liu ona, no agora tama ba faze daruak, hahú hosi 2016 to’o 2020 hanesan kontinua dezenvolvimentu rekursu umanu, kontinua dezenvolvimentu infraestrutura, dezenvolve indústria estratéjika, no iha faze datoluk hahú 2021 to’o 2030 maka halakon ki’ak, setór privadu forte, diversifikasaun ekonomia”, afirma Diretór Polítika Ekonomia ne’e.

Nia mós aprezenta sobre orsamentál ba kategoria sira ba OJE 2019 no 2020 katak, iha kategoria saláriu no vensimentu iha orsamentu 2019 hamutuk $214,046 no ba 2020 hamutuk $241,271.

Iha 2019, orsamentu ba bens no servisu $478,262, no OJE 2020, mak $738,428. Transferénsia públika iha 2019 hamutuk $705,117 no iha 2020 hamutuk $457,773. Iha kategoria kapitál menór ba OJE 2019 hamutuk $29.401, no ba 2020, $53,267. Kapitál dezenvolvimentu iha OJE 2019 hamutuk $400,173, no OJE 2020 hamutuk $459,260.

Totál orsamentu 2020 ne’e, Governu liuhosi reuniaun Konsellu Ministru, kuarta ne’e, aprova ona Proposta Lei Orsamentu Jerál Estadu (OJE) ho biliaun $1,950.

Notísia relevante : Konsellu Ministru Aprova Proposta OJE 2020 Biliaun$1,950

Jornalista : Antónia Gusmão

Editora : Maria Auxiliadora

iklan
iklan

Leave a Reply

iklan
error: Content is protected !!