Prezidente Autoridade Nasionál Petróleu no Minerál, Gualdino da Silva.Imajen/TATOLI

DILI, 2 setembru 2019 (TATOLI)–Prezidente Autoridade Nasionál Petróleu no Minerál (ANPM), Gualdinho da Silva, hateten bainhira Projetu Lei Kódigu Mineiru sai lei ona sei regula atividade minerál hotu-hotu iha rai maran.

“Konteúdu hosi Projetu Lei ne’e oinsá atu bele regula atividade mineiru ba minerál hotu-hotu, hahú hosi peskiza buka minerál, halo estrasaun to’o halo reabilitasaun ba fatin mina ninian”, Gualdinho da Silva ko’alia hafoin enkontru ho Komisaun D trata Asuntu Ekonomia no Dezenvolvimentu kona-ba Projetu Lei refere iha Parlamentu Nasionál, kuarta ne’e.

Prezensa ekipa hosi ANPM inklui Ministériu Petróleu no Rekursu Minerál (MPRM) iha Parlamentu Nasionál konvida hosi Komisaun D hodi ko’alia Projetu Lei númeru 4/V(1ª) kona-ba Kódigu Mineiru.

Gualdinho hateten Projetu Lei ne’e mós atu regula tipu lisensa oioin ba seña minerál katak ho valór ekonómiku ki’ik-oan, indústria minerál no mós seña minerál ho valór ekonómiku boot liu.

Nia hatutan, Projetu Lei ne’e sei regula de’it minerál sira iha rai maran, maibé ba tasi laran sei haree iha futuru, tanba tratamentu la hanesan.

“Agora foku ba rai maran. Ita-nia estudu prelimináriu hosi Ministériu Petróleu liuhosi Instititu Petróliu no Jeolojia, indika ona ita iha minerál lubuk ida mak iha valór ekonómiku ne’ebé ita bele uza ba ita-nia nasaun, hanesan rekursu naun metálikus. Ne’e mak hanesan simentu iha Kablaki no Baucau, mármores, osan-mean no manganes”, nia esplika.

Tanba ne’e, Gualdinho tenik, presiza halo estudu barak liután hodi mellora koñesimentu kona-ba rekursu naturál hirak ne’e ninia ezisténsia, nune’e hatene kuantidade, kualidade no distribuisaun.

Nia dehan, bainhira Projetu Lei ne’e sai lei ona, Timor-Leste iha ona pozisaun forte hodi halo negosiasaun ho investidór sira mai investe no bele asegura Estadu nia interese kona-ba rekursu naturál sira iha rai maran.

Nia subliña, bainhira diskusaun projetu lei ne’e tama iha espesialidade, ekipa MPRM sei halo audiénsia nafatin ho Komisaun D nune’e diskute kada artigu hosi projetu lei ne’e.

Iha fatin hanesan, Prezidente Komisaun D ne’ebé trata asuntu Ekonomia no Dezenvolvimentu, Virgínia Ana Belo, esplika Projetu Lei ne’e importante tanba durante ne’e Estadu laran metin de’it ba fundu minarai.

“Ita tenta buka saida mak bele fó mai ita. Entaun, ita iha riku-soin barak tebes fora hosi petróleu nian, tanba estudu ne’ebé halo hosi Institutu Petróleu no Jeolojia iha Timor laran tomak bele ajuda reseita doméstika ba ita”, nia katak.

Iha audiénsia ne’e marka prezensa hosi Sekretáriu Estadu Meiu Ambiente, Demétrio Amaral, ekipa hosi MPRM, ekipa hosi ANPM no deputadu sira hosi Komisaun D.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here