Diretór Asosiasaun Arbitrajen Timor-Leste, Aniceto Berlo. Imajen Tatoli/Hortençio Sanchez

DILI, 2 outubru 2019 (TATOLI)—Diretór Asosiasaun Arbitrajen Timor-Leste, Aniceto Berlo, hateten Prezidente Federasaun Futeból Timor-Leste (FFTL), Francisco Jerónimo aprova ona árbitru hamutuk 12 atu dirije jogu Terseira Divizaun Liga Futeból Amadora (LFA) époka 2019.

“Árbitru sira ne’ebé mak atu dirije jogu Terseira Divizaun nian ne’e hetan ona aprovasau hosi prezidente federasaun. Entaun, signifika, sira mak sei dirije jogu ne’e to’o ramata,” tenik Berlelo iha edifísiu FFTL, Bairru Formosa, Dili, kuarta ne’e.

Tanba ne’e, nia haktuir, Asosiasaun Arbitrajen halibur ona árbitru sira ne’e hodi hala’o reuniaun nune’e bele esplika kona-ba tékniku nian oinsá bele dirije jogu ho di’ak.

“Ami sei iha tempu loron rua ka tolu hanesan ne’e atu dirije jogu ne’e. Entaun, sei iha matéria ida iha árbitrajen nian atu halo avaliasaun fali no fó hanoin mós ba sira nune’e sira ba dirije jogu tuir ona saida mak ami deside ona,” tenik Berlelo.

Árbitru sira ne’e mai hosi Ermera, Liquiçá, Manatuto, Baucau, Viqueque no Dili. Hosi árbitru hirak ne’e, iha hotu sertifikadu hosi FFTL no antes ne’e sira mós dirije ona jogu komunitáriu sira iha ida-idak nia munisípiu.

Entretantu, tuir informasaun, jogu Terseira Divizaun sei hahú iha 8 outubru agora.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here