Prezidente Autoridade Munisípal Dili, Gaspar Soares (klaran) akompaña husi Komandante PNTL Municipio Dili, Armando Monteiro (karuk) enkontru ho Komunidade Kampung Alor no Negosiante sira. Imajen/Tatoli.

DILI, 02 outubru 2019 (TATOLI) – Portavós Negosiante Indonéziu, Andi Rusdi, hatete vendedór ho totál 207 ne’ebé hala’o atividade negósiu iha Kampung Alor laiha kbiit atu aluga fatin iha Golgota-Komoro.

“Ami apoia desizaun Governu ho moralmente, maibé ami laiha kbiit atu aluga fatin iha Golgota hodi hala’o negósiu,” Portavós Negosiante ne’e afirma iha Sede Suku Kampung Alor, ohin.

Tuir nia, husi totál komersiante 270 ne’e kuaze 100-resin mak laiha kbiit atu aluga fatin iha Golgota ho kada fulan $500.

“Kolega sira na’in-80 mak asina kontratu ona ne’e kuaze 50 de’it mak iha kbiit atu aluga, maibé sira seluk ne’e laiha kbiit”, katak.

Tanba ne’e, nia husu Governu atu uza meiu seluk ka fatin seluk atu sira kontinua hala’o atividade.

“Ami hanoin bele buka fatin seluk ba ami tanba fatin iha Golgota kada fulan selu $500 ne’e seidauk konta ho selu taxa”, sujere.

Nia salienta: “Laiha ona fatin seluk ba di’ak liu ami fila bá indonézia (pulang kampung)”, katak.

Iha fatin hanesan, Portavós uma-na’in Kampung Alor, Martinho Martins, dehan Governu deside muda negosiante sira fó impaktu tebes ba abitante sira ne’ebé durante ne’e aluga uma.

“Ami durante ne’e hetan osan husi sira (negosiante) hodi sustenta ami-nia moris, selu oan nia eskola, maibé muda ami atu foti osan husi ne’ebé?”, haktenik.

Prezidente Autoridade Munisípiu Dili, Gaspar Soares, dehan polítika Governu atu fó fatin dignu ba negosiante estranjeiru sira liuliu negosiante indonéziu sira.

“Fatin iha Golgota ne’e luxu tebes ne’ebé Governu fó no ami-nia timoroan la hetan, maibé imi sira hetan”, katak.

Ba negosiante ne’ebé laiha kbiit, nia husu bele buka ona fatin ne’ebé tuir kapasidade hodi hapara ona atividade negósiu iha área ne’e. “Ita hakarak ka lakohi tenke muda hahú husi ohin to’o 9 outubru”, afirma.

Diretora Nasionál Regulasaun Komersiál no Protesaun Konsumidór MTKI, Manuela da Silva Tilman, dehan atividade fa’an iha Kampung Alor mak Governu deside hapara tanba besik Meskita ne’ebé úniku iha kapitál Dili no sai patrimóniu Estadu no Governu hakarak hala’o ona polítika urbanizasaun.

“Ita-nia Governu deside hapara de’it atividade negósiu, ba aluga uma komunidade ne’e karik sira hakarak aluga, nafatin iha ne’e ou bá fatin seluk ne’e depende ba sira (negosiante indonéziu)”, nia afirma.

Governu deside hahú kuarta ne’e to’o 9 outubru, atividade negósiu iha Kampung Alor tenke hapara no mamuk ona.

Notísia relevante : 9 Outubru, Data Ikus Negosiante Kampung Alor Hamamuk Fatin

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here