Prezidente Sensu Agríkola 2019, Elias dos Santos Ferreira. Imajen/Jogerjo Guterres.

DILI, 02 outubru 2019 (TATOLI) – Prezidente Komité Tékniku Sensu Agrikultura 2019, Elias dos Santos Ferreira, agradese ba autoridade lokál sira tanba koopera di’ak tebes ho entrevistadór sira bainhira realiza sensu ida ne’e.

“Hafoin hala’o tiha sensu ne’e ami bá vizita munisípiu balu hanesan Vikeke, Lautein, Aileu, ami haree no sente katak autoridade lokál sira ne’e koopera tebes. Buat sira ne’e akontese hafoin ita-nia na’i-ulun sira fó sai informasaun, tanba sensu ne’e mós fó insentivu ba ita-nia autoridade lokál sira, parte Polísia hodi nune’e kontribui tanba sensu ne’e tinan sanulu maka realiza ne’ebé sira iha devér atu kolabora”, informa Elias Ferreira iha nia kna’ar fatin Kaikoli, ohin.

Ba kooperasaun di’ak ne’e, Diretórr Jerál Estatístika ne’e sente orgullu tanba antes ne’e husi Diresaun Estatístika sira realiza ona sensu uma-kain.

“Ami realiza ona sensu uma-kain desde 2004, 2010, no 2015, depois realiza mós peskiza sira hanesan demografia saúde, forsa traballu, ami iha ligasaun sempre di’ak ho ministériu sentrál liuliu diretór jerál desentralizasaun administrativa ne’ebé dala barak ami sempre halo komunikasaun ba sira depois sira fó orientasaun ba autoridade tanba ami labele fó orientasaun diretamente ba xefe suku no aldeia sira”, dehan Elias.

Elias afirma mós to’o oras ne’e sira seidauk simu informasaun ruma katak iha ema ruma baku entrevistadór, maibé umakain sira kolabora di’ak tebes no povu kontente katak ho dadus ne’e Governu bele halo planu di’ak.

Tuir planu semana ne’e, komité tékniku sira tantu hosi Ministériu Finansa no Ministériu Agrikultura no Peska sei tun bá munisípiu sira hodi halo vizita.

Notísia relevante : Sensu Agrikultura 2019 Iha Ona Progresu

Jornalista : Antónia Gusmão
Editora : Maria Auxiliadora 

HAKEREK NO HATÁN

Please enter your comment!
Please enter your name here