DILI, 01 outubru 2019 (TATOLI)-Vítima Dezastre Naturaís iha tinan 2018-2019 hamutuk uma kain 648 iha Munisípiu Baucau simu ona apoiu materiál konstrusaun, orsamentu mão de obra inklui ai-kuadradu husi Governu liuhusi Sekretáriu Estadu Protesaun Sivíl.
Notísia Relevante: Vítima Dezastre Naturaís iha Baucau Hetan Apoiu Materiál Konstrusaun
Husi totál númeru benefisiáriu ne’e, uma kain 462 rejista iha 2019 no uma kain 186 iha tinan 2018.
Diretór Jerál Sekretáriu Estadu Protesaun Sivíl, Ismael da Costa Babo, relata, vítima dezastre naturaís 2019 simu materiál konstrusaun, osan mão de obra $150/uma kain, inklui ai-kuadradu. Enkuantu benefisiáriu 2018 simu de’it materiál konstrusaun la inklui osan mão de obra no ai kuadradu tanba antes ne’e simu ona.
“Distribuisaun ba apoiu rekuperasaun no orsamentu mão de obra ho ai-kuadradu ba vítima dezastre naturaís, a hahú hala’o iha loron 17 setembru 2019 iha Munisípiu Baucau ho ninia área jurizdisaun Postu Administrativu neen,” informa Ismael Babo, ohin, ba Ajénsia TATOLI iha nia serbisu fatin, Caicoli, Dili.
Totál orsamentu ba mão de obra purvolta $6.408 no ai kuadradu $69.300,00, maka SEPS uza hodi fó apoiu ba vítima sira.
Iha outubru ne’e, sei kontinua halo distribuisaun materiál no osan mão de obra ba vítima dezastre naturaís husi Munisípiu seluk, tanda dadaun ne’e kompañia Vitória importa ona materiál konstrusaun hodi fornese ba Governu.
“Ha’u fiar katak, iha fulan ne’e nia laran sei halo distribuisaun hodi fó apoiu mós ba vítima sira iha munisípiu seluk,” Ismael Babo tenik.
Jornalista : Nelson de Sousa
Editór : Francisco Simões
