Vendedór ai-fuan fresku iha merkadu Lecidere. Imajen António Goncalves

BAUCAU, 25 setembru 2019 (TATOLI)—Prezidente Autoridade Munisipál Baucau, António Guterres, hateten enkontru ho UN Woman atu reforsa em termos treinamentu marketing ka merkadória no mós treinamentu ba lideransa nian ba vendedór sira iha Munisípiu Baucau.

Nia hateten, lideransa labele afeta liu ba ema sira ne’ebé tuur iha prosesu administrasaun mákina  estadu nian maibé bele nakloke ba sidadaun hotu-hotu. Envolve sosiedade tomak liuliu vendedór sira para bele mai rona esperiénsia kona-ba vendedór nian husi bainaka ne’ebé mai husi Papua Nova Guine hodi komprende no jere merkadu ne’ebé agora daudauk uza hela ba moris.

“Entaun horisehik no hodibainrua, ita simu bainaka ida husi Papua Nova Guine, Xana Dikupa, ne’ebé atu mai partilla nia esperiénsia kona-ba vendedor nian. Nia hanesan prezidente de asosiasaun vendedor iha Papua ne’ebá. Nia mai kedas hodibainrua, mai hasoru vendedór Baucau Vila, Vemase, Venilale, Laga, Baguia, hodi partilla nia esperiénsia,” dehan Prezidente Autoridade Munisipál Baucau, António Guterres, ba Ajénsia TATOLI iha nia knaar fatin, Baucau Vola Nova, loron hirak liu ba.

Bazeia ba esperiensia ne’ebé bainaka ne’e haktuir, tuir nia, merkadu ne’e loloos vendedór sira mak jere entaun tenke envolve vendedor Baucau mak rona no fó solusaun rasik ba problema ne’ebé sira enfrenta. Tanba, em termos jestaun, sira harii kedas grupu ida mak jere iha merkadu.

Tuir bainaka ne’e nia esperiénsia, nia haktuir, bainhira asosiasaun vendedór ne’e moris tenke kria kada grupu hanesan fa´an naan ketak, fa´an ikan ketak, fa´an modo-tahan ketak, fa´an nesesidade bázika ketak, ne’ebé sira hirak ne’e hamahon-aan iha Asosiasaun Vendedór ne’e nia laran.

“Baucau oan sira labele sukit liman ba estadu maibé saida mak ita kontribui ba ita-nia estadu. Tan ne’e mak ita bolu bainaka husi Papua mai atu inspira vendedór sira iha Baucau Vila no mós motiva vendedór sira oinsá mak nia responsabilidade rasik sai na’in ba merkadu ne’ebé nia uza ba ninia nesesidade loro-loron,” nia hateten.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here