Diretór Ezekutivu Ospitál Referál Suai, Bernadino Armando da Silva. Foto TATOLI: Eugenio Pereira

COVALIMA, 01 outubru 2019 (TATOLI) –Totál profisionál saúde iha Ospitál Referál Suai hamutuk na´in 35, ne´ebé kompostu husi médiku jerál 12, parteira 15 inklui pesoál saúde sira seluk maske nune´e númeru ne´e seidauk koresponde populasaun sira iha Suai. Tanba ne´e, husu ba Ministériu Saúde (MS) atu aumenta tan profisionál saúde sira iha ospitál ne´e.

Diretór Ezekutivu Ospitál Suai, Bernadino Armando da Silva hateten, obstaklu bo’ot ida kuandu médiku sira ne’e mak lisensa maternidade ka ba eskola difikulta tebes servisu saúde nian. Tanba ne’e mak iha 2020 Ministériu Saúde presiza tau atensaun ba asuntu ne’e.

“Ita konsidera númeru ne’e seidauk sufisiente atu kobre hotu servisu atendimentu ba populasaun iha Suai laran tomak ne’ebé mai halo tratamentu iha ospital ne’e,” tenik Diretór Bernadino Armando ba jornalista Ajénsia TATOLI iha ninia serbisu fatin Ospital Suai Vila, tersa (01/10/2019).

Diretór ne’e hateten tan, razaun husu aumenta profesional saude sira ne’e tanba ospital iha turnu (shift) ba pesoál saude sira entaun tenke iha extra ba sira. “Seidauk tan balun moras, einfremeira balun husu lisensa maternidade, balun ba eskola tiha, ida ne’e mak sai obstákulu,” nia konsidera.

Diretór Ezekutivu Ospitál Suai, Bernadino Armando da Silva informa, husi pesoál saúde sira ne’e parteira foin mak 15.

“Oinsá kuandu dader to’o kalan atende inan sira partus ho volume 10 ba leten ne’e mos obstaklu ida. Maibé, parte ospitál rasik iha ona politika interna atu motiva nafatin parteira sira tenke iha ekstra mós ba sira hodi  bele asegura atendimentu ba pasiente sira ho di´ak,” haklaken médiku timoroan ne´e.

Maske ezekutivu Ospitál Suai, Bernadino Armando da Silva la detalla númeru pesoál saude hira mak ospitál Suai presiza tan maibé, tuir ezekutivu ne´e, mehi ospitál ne’e nian hakarak lori saúde besik liután ba komunidade Suai iha 2020.

Notísia relevante:Tanba Moos, Ambiente Ospitál Suai Kategória “Eselente”

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here