Ospitál Referál Suai. Foto TATOLI: Eugenio Pereira.

COVALIMA, 01 outubru 2019 (TATOLI)-Autoridade kompotente Ospitál Referál Suai, Covalima prepara ona planu no programa ba 2020 hodi dezenvolve aan di´ak liután hodi responde movimentu komunidade internasionál nian iha Suai hodi hatutan projetu supplay base iha Tasi Mane.

Planu estratéjiku ne’e tama ona iha vigór no hakarak Ospitál Suai diferensa ho ospitál referál sira seluk.

Diretór Ezekutivu Ospitál Suai, Bernadino Armando da Silva hateten, presiza duni moderniza ospitál ne’e tanba 2020 ba oin kondisaun sei la´o oin seluk. Atendementu la hanesan ona ho kondisaun ida agora.

“Agora ita sei atende de’it ba komunidade ita nian rasik maibé 2020 ba oin ita sei atende komunidade internasionál sira ne’ebe serbisu iha projetu Tasi Mane. Tan ne’e ita presija moderniza ospitál ne’e,” tenik Diretór Bernadino ba jornalista Ajénsia TATOLI iha ninia serbisu fatin ospitál Suai, tersa (01/10/2019).

Nia akresenta, kondisaun ospitál Suai presiza moderniza. Tan ne’e, 2020 sei halo daudaun rehabilitasaun ba kuartu sira iha ospitál laran tomak, sala internamentu ba pasiente enfermária iha ona kama 21 maibé kondisaun ladi´ak entaun tenke renova depois aumenta tan kama 20 inklui VIP (Very Important Person).

“Ita presiza halo espansaun ba sala sira klo’ot liu ne’e atu haluan tan hanesan sala operasaun, sala raiu-X hodi nune’e bele akumula makina city scane inklui sala izolamentu ba moras hada’et nian no mós sala laboratóriu,” dehan médiku timoroan ne´e.

Tanba ne’e, tuir Diretór Bernadino katak kuandu kondisaun Ospitál Suai nian sufisiente ona entaun rekursu umanu tenke aumenta ne’e duni 2020  profesionál Saúde iha Ospitál Suai tenke atinji 110. Entaun médiku agora 12 presiza tan 28,  hamutuk 40, parteira 15 presiza tan 10 hamutuk 25, enfermeiru 10 presiza tan 35. hamutuk 45. “Ho totál númeru ida ne’e bele ona responde kondisaun iha futuru mai,” nia garante.

Jornalista : Tomé Amado

Editór       : Rafy Belo

 

HAKEREK NO HATÁN

Please enter your comment!
Please enter your name here