Sesaun plenária Parlamentu Nasionál. Imajen/Tatoli

DILI, 01 outubru 2019 (TATOLI) – Bankada opozisaun FRETILIN konsidera desizaun Bankada Governu (CNRT, PLP no KHUNTO) liuhosi plenária hodi kansela vizita traballu Prezidente Repúblika (PR), Francisco Guterres ‘Lú Olo’ ba Indonézia no Japaun, bele lori impaktu adere ka la’e ba Asosiasaun Nasaun Sudeste Aziátiku (ASEAN).

Liuhosi sesaun plenária iha tersa ne’e (30/09), Parlamentu Nasionál (PN) kansela viajen PR Lú Olo ba Indonézia ho votu a-favór 29, kontra 31 no abstensaun 0, enkuantu viajen ba Japaun, ho votu a-favór 29, kontra 31 no abstensaun 0.

Deputadu Bankada FRETILIN, Marito Mota, konsidera entre nasaun iha sudeste aziátiku, Indonézia mak fó apoia maka’as Timor-Leste nia adezaun ba ASEAN tanba ne’e presiza iha relasaun di’ak ho nasaun viziñu ne’e.

Notísia Relevante: PN La Autoriza Viajen PR Lú Olo ba Indonézia no Japaun

Nia dehan, PN loloos autoriza Xefe Estadu nia viajen traballu tanba vizita ne’e atu halo polítika ho rai seluk liuhosi kooperasaun bilaterál no multilaterál.

“Ita kansela vizita Prezidente Repúblika ba Indonézia tanba ita hatene katak Indonézia nasaun ida boot no influénsia iha ASEAN hodi bele lori Timor-Leste tama ASEAN, maibé ita la respeita no la konsidera konvite Indonézia nian. Ida ne’e impaktu ida, ita presiza tetu, loloos ne’e autoriza tanba Indonézia apoia maka’as Timor-Leste nia adezaun ba ASEAN”, Deputadu ne’e levanta iha plenária Parlamentu Nasionál, tersa ne’e.

Nune mós Deputadu Bankada FRETILIN, José Pacheco, hateten nasaun sira iha ASEAN, Indonézia mak infulénsia boot liu atu Timor-Leste adere ba ASEAN.

“Loloos ne’e Parlamentu Nasionál tetu no haree ba asuntu sira ne’e”, hateten Deputadu bankada FRETILIN ne’e.

Iha parte seluk, Deputadu Bankada CNRT, José Virgílio, argumenta PN kansela viajen Xefe Estadu bazeia ba lei.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here