Asosiasaun Kondutór Munisípiu Dili halo konferensia imprensa ba kazu membru PMNTL ida ne'ebé baku sira nia maluk kondotor Samuel da Costa. Imajen/Nelson de Sousa

DILI, 01 outubru 2019 (TATOLI)-Asaun ‘brutalidade’ ne’ebé envolve autór ba mantein Lei ho Orden kontinua eziste.

Notísia Relevante : Ministru Filomeno “Hirus” Oknum Polisia Kontinua Baku Joven

Foin lalais, membru PNTL baku joven ida iha Munisípiu Baucau. Laliu fulan de’it, membru PNTL husi Unidade Polisia Fronteira mós halo asaun hanesan hodi baku mós ema ua’in iha Fronteira tanba de’it ultrapasa fronteira la iha dokumentu.

Aktu “baku” ne’e la eziste iha  estatutu PNTL no Lei Orgániku PNTL, inklui Lei Inan rasik la fó dalan atu ema seluk baku seluk fali, liuliu la fó kompeténsia ba PNTL atu baku ema.

Notísia Relevante : HAK Rekomenda Loke Investigasaun Profunda Ba Polisia Baku Joven

Dalan ne’ebé loos liu mak PNTL iha kompeténsia atu kaer ema hodi lori ba submete iha investigasaun no prosesa tuir lei mak vigor. Tanba ne’e mak, Governu liu husi Ministru Interiór Interinu, Filomeno da Paixão de Jesus, alerta ona atu Polisia la bele baku ema no polisia la iha duni kompeténsia atu baku ema.

Notísia Relevante : PDHJ Rejista Membru PNTL 62 Komete VDU- DBG

“Ema ruma sala, kaer tau borgol no lori ba halo investigasaun hodi prosesa tuir lei. La’ós baku no Polisia la iha obrigasaun no la iha direitu atu baku ema,” afirma Ministru Interiór Interinu, Filomeno da Paixão de Jesus, hodi hatán kona-ba aktu ne’ebé membru PNTL sira halo hodi baku lesuk joven ida iha Munisípiu Baucau.

Iha segunda (30/09/2019), aktu hanesan akontese fila-fali. Ba dala ida ne’e, membru PNTL ida  ‘foti liman’ hasoru motorista Samuel da Costa ne’ebé rezulta vítima nia matan fukun kanek.

Motorista mikrolete 04 ho xapa matrikula 36.514 TLS, simu pankada husi membru Polisia ida tanba de’it asidente tráfegu entre mikrolete ne’ebé vítima kondús soke karreta avansa kór azúl ne’ebé kondús husi membru PNTL ida.

Ho akontesimentu ne’e, halo kondutór lubun ne’ebé hamahan-an iha Asosiasaun Kondutór Munisípiu Dili (AKMD) loke ibun hodi kondena aktu membru PNTL ida nian ne’e hodi  lamenta no kondena maka’as atitude PNTL ida ne’e nian ne’ebé la refleta ba serbisu PNTL nian atu “Mantein Lei ho Orden”.

Liuhusi konferénsia imprensa ne’ebé hala’o iha Merkadu Taibessi, Dili, ohin, responsavel AMKD,  Egas Ximenes da Costa, husu ba Komandu PNTL no Ministériu Interiór atu toma atensaun ba hahalok membru PNTL sira ne’ebé ho atitude “bandalizmu” ne’ebé bele prejudika kredibilidade instituisaun PNTL nian.

“Lamenta tebes ho atitude  pesoál PNTL uza nia podér  hodi halo agresaun fíziku hasoru kondutór Samuel da Costa,” afirma Egas Ximenes da Costa, hodi dehan katak, kazu ne’ebé mosu la’ós tanba  ho hakarak, maibé asidente mosu iha situasaun engarrafamentu tránzitu.

“Karreta no motor iha oin halai no ha’u mós halai tuir iha kotuk depois  pesoál membru PNTL ne’e ho karreta privada Avanza mós halai tama hodi  soke mikrolete 04 ne’ebé ha’u kondús,” vítima konta tuir.

Bainhira mosu asidente ne’e, derrepente de’it membru PNTL ne’e ho farda kompletu tuun husi nia karreta Avansa mai tuku vítima dala rua iha oin no tebe dala rua iha kotuk laran.

Mezmu nune’e, motorista ne’e la dekor identidade pesoál PNTL  ho nia xapa matrikula transporte ne’e tanba kondisaun oin nakukun.

Motorista sira hato’o ona keixa ne’e ba Komandu PNTL Munisípiu Dili, segunda (30/09/2019), atu buka tuir membru PNTL ne’e tanba la’ós baku de’it mas membru PNTL ne’e mós hasai lia fuan mal ba vítima.

“Ha’u lae karik la ba hato’o keixa, maibé pesoál PNTL ne’e hasai liafuan ba ha’u  katak nia kuandu tama iha pikete (jaga) hetan ha’u sei baku nafatin ho ida ne’e mak ha’u  ta’uk hodi husu protesaun ba Polisia,” hateten vítima.

To’o notísia ne’e públika seidauk hetan konfirmasaun husi parte relevante, inklui Komandu Polisia Nasionál Timor-Leste.

Jornalista          : Nelson de Sousa

Editór                : Francisco Simões

 

HAKEREK NO HATÁN

Please enter your comment!
Please enter your name here