Prezidente Tribunál Rekursu, Deolindo dos Santos. Imajen Egas Cristovão

DILI, 1 outubru 2019 (TATOLI) – Durante féria judisiária, Tribunál Rekursu trata kazu urjente sira no mós trata serbisu balun.

Kestaun ne’e Prezidente Tribunál Rekursu (PTR),  Deolindo dos Santos relata ba Prezidente Repúblika (PR), Francisco Guterres Lú Olo durante enkontru mensál ne’ebé hala’o iha Palásiu Prezidente Nicolau Lobato, Bairru Pité, ohin.

Hafoin enkontru, Deolindo hateten, primeiru, informa ba Prezidente Repúblika katak depois féria judisiária, Tribunál komesa funsiona hikas iha loron 16 setembru.

Segundu, Deolindo hatutan, relata hikas ba Prezidente Repúblika katak iha tempu badak sei halo rotasaun ba judisiária.

Kona-ba ne’e, PTR ne’e esplika, juiz ne’ebé mak iha Baucau, Suai no Oé-Cusse sei mai iha Dili no balun ne’ebé mak iha Dili ba fali iha Baucau, nune’e bele kria serbisu ne’ebé mak di’ak no lais liután iha Tribunál sira.

Iha mós asuntu seluk ne’ebé PTR relata ba Prezidente Repúblika mak oinsá bele redúz prosesu pendente sira ne’ebé mak iha ho lais liután, liliu konsentra ba Tribunál Distritál Dili tanba iha kazu ne’ebé mak barak liu.

“Ami sei koloka juiz ne’ebé kondisaun di’ak nune’e bele halo atendementu ho lais liu”, nia haklaken.

Maski la temi montante juiz ne’ebé kolokadu, maibé Deolindo dehan, liuhusi enkontru ne’e hato’o mós ba PR Lú Olo kona-ba orsamentu Tribunál nian, tanba orsamentu Tribunál nian ba tinan ida ne’e ezekuta hotu ona, no oras ne’e Tribunál la’o ona ho proposta orsamentu foun iha ne’ebé aprezenta ona ba Komisaun Revizaun Orsamentu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here