DILI, 1 outubru 2019 (TATOLI)-Organizasaun Sosiedade Sivíl Asian Justice and Rights (AJAR) rekomenda ba órgaun kompetente atu reforsa polisia intelijénsia ho Serbisu Nasionál Intelijénsia atu bele iha informasaun ba kazu sira ne’ebé akontese to’o halakon ema nia vida iha públiku.
Notísia Relevante:Polísia Detein Ona Suspeitu Na’in Rua Ba Kazu Konfrontu Ai-mutin
Membru AJAR, Inocêncio Xavier, ba Ajénsia TATOLI, ohin, fó observasaun ba kazu Ai-mutin, katak, kazu ne’e akontese tanba Komandu PNTL la koloka membru sira ho númeru barak hodi fó seguransa to’o ikus mosu insidente ne’e.
Notísia Relevante:Kazu Ai-mutin, Tribunal Aplika Aprezentasaun Periódika ba Suspeitu
Nia dehan, tuir loloos PNTL ho Servisu Nasionál Intelijénsia tenke koloka membru sufisiente iha terrenu hodi fó seguransa ba grupu organizasaun ho ninia membru boot ne’ebé halo movimentu hodi evita krime.
“Tamba iha momentu ne’ebá ne’e ha’u observa ba organizasaun Kolimau 2000 ne’ebé mak halo movimentu husi Bobonaro mai Dili atu tuir misa ida iha Aituri-laran ba tinan 20 organizasaun ne’e hamriik ne’e laiha seguransa ida mak akompaña nune’e joven sira ne’e deskontrolu ho sira-nia emosaun,” nia hateten.
Inocêncio Xavier hatutan tan, PNTL no Komisaun Organizadora mós menus koordenasaun no komunikasaun di’ak ba malu hodi to’o ikus membru organizasaun ne’e lao deskontrolu to’o hamosu konflitu.
Jornalista :Osório Marques
Editór : Francisco Simões
